Rıdder jylý ortalyǵynda qazandyq óship, halyq taǵy ystyq sýsyz qaldy

Shyǵys Qazaqstan oblysy Rıdder qalasyndaǵy jylý elektr ortalyǵynda qazandyq óship, halyq taǵy ystyq sýsyz qaldy, dep habarlaıdy QazAqparat tilshisi.

Jaz boıy ystyq sýsyz otyrǵan Rıdder halqyna osydan birneshe kún buryn ǵana ystyq sý berilgen. Alaıda keshe ystyq sý taǵy óshirildi. Buǵan sebep – jylý elektr ortalyǵyndaǵy iske qosylǵan ortasha qysymdy qazandyqtyń qaıtadan óshirilýi.

Al onyń ne úshin óshirilgenin Rıdderdegi «Sý arnasy» kommýnaldyq memlekettik kásiporyn dırektory Konstantın Han túsindirip berdi.

«Elektr stantsııalary men jelilerin tehnıkalyq paıdalaný erejesine sáıkes, kúrdeli jóndeýden ótken jabdyqtar iske qosylǵannan keıin 48 saǵat ishinde synaqtan ótedi. Osydan keıin qazandyqtyń árbir bólshegin egjeı-tegjeıli tekserý úshin josparly túrde ony óshirý qajet. Sol sebepti №3 jylý qazandyǵy ýaqytsha óshirilgen», - dep túsindirdi ol.