Rıdder JEO-sy kommýnaldyq menshikke beriledi - komıssııa
QR Premer-Mınıstri Álıhan Smaıylov ortalyq memlekettik organdar, Bas prokýratýra, QMA, BQDA jáne basqa da vedomstvolar basshylarynyń qatysýymen Ekonomıkany demonopolızatsııalaý jónindegi komıssııanyń kezekti otyrysyn ótkizdi, dep habarlaıdy Kazinform agenttigi.
Komıssııa Rıdder qalasyndaǵy JEO-nyń aınalasynda qalyptasyp otyrǵan jaǵdaıdy qarastyrdy. Energetıka mınıstri Almasadam Sátqalıev ótken jyldyń qazan aıynan bastap stantsııada birqatar apat oryn alyp, sonyń kesirinen qala turǵyndaryn jylýmen jáne elektrmen jabdyqtaýda irkilister bolǵanyn eske saldy. JEO-nyń burynǵy ıeleri ony jańǵyrtý jáne kúrdeli jóndeý jumystaryna ınvestıtsııa salmaǵandyqtan, stantsııanyń tehnıkalyq jaı-kúıi ábden tozyp bitýge aınalǵan.
Bıyl Úkimet rezervinen jáne oblys ákimdiginen bólingen qarajat esebinen stantsııanyń barlyq 6 qazandyǵyna jóndeý jumystary júrgizilýde. Qazirgi ýaqytta 3 qazandyq boıynsha iske qosý jumystary júrip jatyr, taǵy 3 qazandyqty jóndeý jyl sońyna deıin aıaqtalady dep josparlanyp otyr.
JEO-nyń jańa menshik ıesimen júrgizilgen kelissózder qorytyndysy boıynsha ınvestor kásiporynnyń barlyq qaryzyn ótep, stantsııany ákimdiktiń kommýnaldyq menshigine beredi degen ýaǵdalastyqqa qol jetkizildi.
Premer-Mınıstr JEO-ny jergilikti atqarýshy organdardyń balansyna qabyldaý úshin barlyq qajetti uıymdastarý-quqyqtyq jumystardy júrgizýdi tapsyrdy.
Sonymen qatar otyrysta Aqmola oblysy aýdandarynyń birinde elektr jelilerine ıelik etetin jekemenshik kásiporynnyń jumysy qaraldy. Kompanııa 20 myńnan astam adam turatyn 38 aýyldyq eldi mekendi elektr energııasymen qamtamasyz etýi tıis. Sondaı-aq menshik ıesi uzaq jyldan beri elektr jelilerin jóndemegen, sonyń saldarynan únemi apattyq jaǵdaılar týyndap, tutynýshylarǵa is júzinde qyzmet kórsetilmegen.
Búginde elektr jelilerin paıdalaný men jóndeýdi, sondaı-aq osy eldi mekenderdiń turǵyndaryn elektrmen jabdyqtaýdy tabıǵı monopolııanyń basqa sýbektisi ýaqytsha júzege asyryp jatyr.
Talqylaý qorytyndysy boıynsha ýákiletti memlekettik organdarǵa istiń mán-jaıyn anyqtap, kásiporyn jumysyna quqyqtyq baǵa berý, energetıkalyq ınfraqurylymdy jeke menshikke berýdiń zańdylyǵyn tekserý jáne tıisti usynystar ázirleý tapsyryldy.
