Rıdder JEO-nyń jańa ıesi kómir óndiretin zaýyt salmaq
ShQO ákimdiginiń málimetine súıensek, Rıdder JEO-ny satyp alǵan kompanııanyń jylý energetıkasynda úlken tájirıbesi bar.
«Bul kompanııa Astana men Qaraǵandy qalalarynda jumys isteıdi. JEO-ny satyp alý somasy kommertsııalyq qupııa. Jańa ınvestor jumysqa kirisip ketti. Ol Rıdderde qortqy kómir óndiretin zaýyt salýdy josparlap otyr. Sebebi bul ónim búkil álemde jáne Qazaqstanda suranysqa ıe. Ony óndirý kezinde qazandyq agregattaryn jaǵý úshin qoldanylatyn gaz bólinedi», - deıdi oblys ákiminiń orynbasary Erjan Nurbaev.
Onyń aıtýynsha, qortqy kómir óndirisinde sýdy joǵary temperatýrada 95 gradýsqa deıin qyzdyrady, ony jylý jelisinde qoldanýǵa bolady.
«Jańa menshik ıeleri «Qazmyrysh» kásipornymen de iskerlik áriptestik ornatýǵa nıetti. Olar metallýrgııalyq JShS úshin de qortqy kómir óndirýge daıyn. Al artyq qalǵany Qytaıǵa eksporttalatyn bolady. Qortqy kómir shyǵaratyn zaýyt qurylysynyń taǵy bir artyqshylyǵy - bul ekologııalyq komponent, óıtkeni qortqy kómir óndirisinde kúl shyqpaıdy», - deıdi E.Nurbaev.
Eske salsaq, keshe Rıdderdegi jylý elektr ortalyǵynyń ıesi aýysqany habarlanǵan.