Rıdder JEO-daǵy órt: Jylytý maýsymy aıaqtalǵanǵa deıin ortalyqta órt sóndirýshiler kezekshilik etedi

ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵynda jylytý maýsymy aıaqtalǵanǵa deıin órt sóndirýshiler kezekshilik etedi, dep habarlaıdy QazAqparat tilshisi.

Búgin Rıdderdegi jylý elektr ortalyǵynda taǵy da oqys jaǵdaı boldy. Eki qazandyqta órt shyǵyp, úılerde jylý temperatýrasy azaıǵan.

Qazirgi ýaqytta órt sóndirilip, qalypqa keltirý jumystary júrgizilip jatyr.

«Jylytý maýsymyn apatsyz aıaqtaý úshin qoldan kelgenniń bári jasalady. Oblys ákiminiń ókimi boıynsha búginnen bastap jylý elektr ortalyǵynda órt sóndirý mashınalary, tótenshe jaǵdaılar bóliminiń qyzmetkerleri, Rıdder qalasy ákiminiń orynbasary jáne salalyq beıindi vedomstvolardyń ókilderi kezekshilik etedi», - dep habarlady ShQO ákimdigi.