Rıdder JEO-daǵy jóndeý qyrkúıektiń ortasynda aıaqtalyp, úılerge ystyq sý qosylady

ÓSKEMEN. KAZINFORM – Shyǵys Qazaqstan oblysy Rıdder qalasyndaǵy jylý elektr ortalyǵyndaǵy jóndeý jumystary qyrkúıektiń ortasynda aıaqtalyp, úılerge ystyq sý qosylady.

Jylý maýsymy aıaqtalǵan sátten bastan Rıdder jylý elektr ortalyǵynda jóndeý jumystary qolǵa alynǵan. Sol ýaqyttan beri qala halqy ystyq sýsyz otyr.

Búgin Shyǵys Qazaqstan oblysy ákiminiń orynbasary Baqytjan Baıahmetovtiń jetekshiligimen ótken jylytý maýsymyna arnalǵan jıynda jóndeý jumystarynyń óz máresine qashan jetetindigi belgili boldy.

«Jylý jelilerindegi jóndeý bitýge jaqyn. Tórt ýchaskedegi jumystar ǵana aıaqtalmaǵan. Qaıta jańǵyrtý barlyǵy jylý jelileriniń 19 shaqyrymyn qamtıdy. Jumystardy 4 qyrkúıekke aıaqtaý josparlanǵan», - dep málim etti JEO ókilderi.

15 qyrkúıekte jylý elektr ortalyǵy iske qosylyp, rıdderlikterdiń úılerine ystyq sý beriledi dep josparlanǵan.

Eske salsaq, osyǵan deıin Rıdderdegi jylý elektr ortalyǵy Óskemendegi aktsıonerlik qoǵamnyń quramyna qosylǵanyn habarlaǵan edik.