Rıdder JEO-da órt saldaryn joıý jumystary aıaqtaldy
ShQO ákimdiginiń málimetine súıensek, 25 qańtarda Rıdder qalasyndaǵy jylý elektr ortalyǵynda órt saldaryn joıý jumystary máresine jetti.
«Otyn tsehyn qalypqa keltirý jumystary aıaqtaldy. Tasymaldaýysh taspa tolyǵymen ornatylǵan. Ol qazir synaq rejıminde iske qosyldy. Aldaǵy bir saǵattyń ishinde oǵan kómir salamyz. Bul kómir barlyq qazandyqtarǵa úlestiriledi», - deıdi qala ákimi Dmıtrıı Gorkovoı.
Onyń aıtýynsha, qazirgi ýaqytta ortalyqta qosymsha 4 qazandyq jumys istep tur. Jylý temperatýrasy qalypty.
Eske salsaq, 19 qańtarda Rıdderdegi jylý elektr ortalyǵynan órt shyqqan bolatyn.
Birneshe saǵattyń ishinde qyzyl jalyn aýyzdyqtaldy.
Keıinnen jylý elektr ortalyǵynyń basshylyǵyna qatysty tergeý júrgizilip jatqany habarlandy.
Danıal Ahmetov Rıdder jylý elektr ortalyǵyndaǵy aqaýlar men apattardan úıleri qaıta-qaıta sýyp ketip otyrǵan turǵyndardan keshirim suraǵan edi.
Oblys basshysynyń aqparaty boıynsha, JEO-ny kúrdeli jóndeýden ótkizýge 7 mlrd teńge qarastyrylyp otyr.
Sonymen qatar jylý elektr ortalyǵynyń ıesi aýysqany belgili boldy.
Foto: tets.kz