Rıdder turǵyndaryna arnalǵan baspananyń qurylysy qalaı júrip jatyr
RIDDER. QazAqparat - Shyǵys Qazaqstan oblysynyń ákimi Danıal Ahmetov dala órtinen zardap shegip, baspanasyz qalǵan Rıdder turǵyndaryna arnap salynyp jatqan turǵyn úı qurylysymen tanysty, dep habarlaıdy QazAqparat.
Bul jaıynda aımaq basshysy Instagram paraqshasynda jazdy.
«Búgin jumys saparymen Rıdder qalasyna bardym. Qurylys alańynda bolyp, merdiger uıymdardyń basshylarymen kezdestim. Barlyq kompanııalarǵa usynǵan jaqsy jobalyq sheshimderi, sondaı-aq qurylysty ýaqtyly jáne tıimdi bastaǵany úshin alǵys aıtqym keledi. Olardyń árqaısysy alda turǵan joǵary áleýmettik jaýapkershilikti sezinetinine jáne óńirimiz úshin mańyzdy mıssııany naqty júzege asyrýǵa barlyq kúsh-jigeri men kásibı tájirıbesin jumsaıtynyna senimdimin» dep jazady Danıal Ahmetov.
Onyń sózine sensek, halyqqa berilgen ýádeniń bári oryndalady. Bul jumys el Prezıdenti Qasym-Jomart Kemeluly Toqaevtyń erekshe baqylaýynda.
«Turǵyndar kúzge deıin turmysyn ornyqtyrý úshin úılerdiń qurylys merzimin qysqartýǵa tyrysamyz. Munda úlken, sapaly úıleri men keń, jaryq kósheleri bar bar ádemi jáne zamanaýı shaǵyn aýdan paıda bolady. Kelesi aptada kelisim jasalǵannan keıin jol tóseminiń negizin daıyndaý jumysyna kirisedi. Úımen qatar birden jol salyp, jaryqtandyrý júrgizip, aýmaqty, sonyń ishinde balalar men sport alańyn abattandyramyz. 24 mamyrda, ýáde etilgendeı, taǵy bir márte turǵyndarmen kezdesý ótkizemin. Merdiger uıymdarmen birge qurylys jumystarynyń barysymen tanystyramyz. Qoldaý men kómek úshin barshańyzǵa zor alǵysymdy bildiremin. Bizdiń kúshimiz - birligimizde» deıdi ákim.
Esterińizge sala ketsek, 10 mamyrda Shyǵys Qazaqstandaǵy Rıdder orman sharýashylyǵynda alapat órt shyqqan bolatyn.
Órtten 1 adam qaza taýyp, ekeýi jaraqat alǵan.
Memleket basshysy Úkimet pen Shyǵys Qazaqstan oblysynyń ákimdigine tilsiz jaýdan zardap shekken Leshoz kentiniń turǵyndaryna kómek kórsetip, baspanamen qamtýdy tapsyrdy.
11 mamyr saǵat 18.20 kezinde órt aýyzdyqtaldy.
