Rıdder turǵynynyń úıinen 7 keli esirtki tabyldy

ÓSKEMEN. KAZINFORM - Shyǵys Qazaqstan oblysy Rıdder qalasy turǵynynyń úıinen 7 keli esirtki tabyldy.

ShQO Polıtsııa departamenti baspasóz qyzmetiniń málimetine súıensek, jedel ýákilder úıde asa iri mólsherde marıhýana saqtaǵan Rıdder qalasynyń turǵynyn ustady.

«Kúdiktiniń jer úıin tintý kezinde salmaǵy 7,2 keliden asatyn, quramynda ósimdik tektes esirtki zatyna uqsas eki karton qorap, eki qaǵaz oramasyna salynǵan qara paket jáne esirtkini qoldanýǵa arnalǵan ydys tárkilendi. Alynǵan zattaı dáleldemeler saraptamaǵa jiberilip, onyń qorytyndysyna sáıkes, paket ishindegi keptirilgen marıhýana ekeni belgili boldy», - delingen aqparatta.

Tártip saqshylary esirtki zattaryn asa iri mólsherde ótkizý maqsatynsyz satyp alý, saqtaý, tasymaldaý faktisi boıynsha qylmystyq is qozǵady.

Kúdikti 7 jylǵa deıingi merzimge bas bostandyǵynan aıyrylýy múmkin.