Rıdder turǵyny temeki tuqylyn tastaǵany úshin salynǵan aıyppulmen kelispeı, polıtseılerdi sotqa berdi

ÓSKEMEN. KAZINFORM – Shyǵys Qazaqstan oblysy Rıdder qalasynyń turǵyny temeki tuqylyn tastaǵany úshin salynǵan aıyppulmen kelispeı, polıtseılermen sottasyp, jeńilip qaldy. 

Er adam Tretıı shaǵynaýdanyndaǵy dúken mańynda jerge temeki tuqylyn tastaǵan. Sol úshin oǵan QR Ákimshilik quqyq buzýshylyq týraly Kodeksiniń 434-baby 2-bóligine sáıkes (qoǵamdyq oryndardy qaıta lastaý) hattama toltyrylǵan.

Alaıda azamat polıtseılermen kelispeı, sotqa shaǵym túsirdi.

- Sot otyrysynda ol temeki tuqylyn qoqys jáshigine tastaǵanyn aıtty. Alaıda sotqa usynylǵan beınematerıaldar, oqıǵa ornyndaǵy fotosýretter jáne kýágerdiń sózi er adamnyń kinásin dáleldedi, - dep habarlady qalalyq sottyń baspasóz qyzmetinen.

Rıdder qalasynyń turǵyny buǵan deıin de osy bap boıynsha jaýapqa tartylǵan. Sot onyń shaǵymyn qanaǵattandyrǵan joq. Endi ol 78 640 teńge kóleminde aıyppul tóleýge mindetteldi.

Eske salsaq, osyǵan deıin Óskemen turǵyny kóligine qulaǵan aǵash úshin kommýnaldyq mekemeden 2,5 mln teńge óndirip alǵany habarlanǵan.