Rıdder turǵyndaryna jylý qashan beriledi
Shyǵys Qazaqstan oblysy Rıdder qalasynda balabaqsha, mektep pen aýrýhanalarǵa jylý berildi, dep habarlaıdy QazAqparat tilshisi.
Rıdder JEO-daǵy sońǵy ahýaldy bilý úshin QazAqparat tilshisi ortalyqtaǵy jóndeý jumystarynyń basy-qasynda júrgen ShQO qurylys, energetıka jáne TÚKSh basqarmasy basshysynyń orynbasary Nurlan Ramazanovqa habarlasyp kórdi.
«Jylý elektr ortalyǵynda eki qazandyq iske qosylǵan. Qazirgi ýaqytta onyń biri jýylyp daıyndalyp jatsa, ekinshisi turǵyn úılerdi ystyq sýmen, balabaqsha, mektep pen aýrýhanalardy jylýmen qamtyp tur. Bıýdjettik mekemelerge jylý berilgenimen ázirge temperatýra tómendeý. Al jospar boıynsha ekinshi qazandyq erteń jýylyp bitýi tıis. Sol kezde úılerge de jylý beriledi», — deıdi ol.
Nurlan Ramazanovtyń aıtýynsha, jóndeý jumystary oıdaǵydaı júrgizilýde. Apta sońynda taǵy bir qazandyq iske qosylady dep kózdelgen.
Al 15 qarashaǵa deıin búkil 6 qazandyq iske qosylýy tıis. Synap baǵanasy 10-15 gradýsqa tómendep ketkende osy ortasha qysymdy 3 qazandyqtyń qýaty úılerdi jylytýǵa jetedi.
Búgin BAQ-ta jáne áleýmettik jelide Rıdder jylý elektr ortalyǵynyń ıesi ony memleket menshigine tegin berip, 5,5 mlrd teńge qaryzdy óz esebinen jabatyny týraly aqparat tarady.
Basqarma basshysynyń orynbasarynan bul týraly da surap kórdik.
«Qazir „Rıdder JEO“ AQ qalalyq ákimdikke qarasty „Vodokanal“ memlekettik kommýnaldyq kásipornyna senimgerlik basqarýǵa berilgen. Tolyqqandy memleket menshigine alý úshin kelissóz júrip jatyr. Biraq mende onyń ıesi ortalyqty tegin berip, qaryzdy jabatyny týraly aqparat joq. Sebebi kelissóz oblys basshylyǵy men kásipker arasynda júrip jatyr», — dep jaýap berdi ol.
