Rıdder turǵyndary úıleriniń salqyndap ketkenine shaǵymdandy

ÓSKEMEN. KAZINFORM – Shyǵys Qazaqstan oblysy Rıdder qalasy turǵyndary úıleriniń salqyndap ketkenine shaǵymdanǵan soń tekserý júrgizildi.

Kesheli beri Gagarın kóshesindegi kópqabatty úı turǵyndary batareıalardyń sýyqtyǵyna shaǵymdanyp jatyr. Soǵan oraı ShQO ákimi Nurymbet Saqtaǵanov Rıdderge baryp, tekserý júrgizdi. 

- Aımaq basshysy jylý elektr ortalyǵy men Gagarın kóshesindegi úılerdiń birine baryp, jylýmen jabdyqtaý júıesiniń jumysyn tekserdi. Qazirgi tańda JEO-da №2, 3, 4, 5 jáne 6 qazandyqtar jumys istep tur, №1 qazandyq rezervte. Ortalyq shtattyq rejımde jumys istep, qalaǵa jylý turaqty túrde berilýde. Gagarın kóshesindegi turǵyn úılerde jylý qubyrlary men batareıalardyń bitelgeni anyqtaldy, - dep habarlady oblys ákimdiginen. 

Keıbir jaǵdaılarda úıdiń jylý toraptaryndaǵy qysymdy durys retteý qajettigi baıqalyp otyr. 

- Úıge berilip jatqan jylýtasymaldaǵyshtyń temperatýrasy joǵary, keri jelide de jylý bar. Anyqtalǵan barlyq másele boıynsha jaýapty qyzmetterge naqty tapsyrmalar berilip, olardyń oryndalýy oblys ákiminiń jeke baqylaýyna alyndy, - delingen aqparatta. 

Eske salsaq, osyǵan deıin Rıdderde ónerkásiptik nysanda topyraqtyń lastanýy men zań buzýshylyqtar anyqtalǵany habarlanǵan.