Rıdder turǵyndary bir aıǵa jýyq ýaqyt ystyq sýsyz qalady
ÓSKEMEN. KAZINFORM — Shyǵys Qazaqstan oblysy Rıdder qalasynda shilde aıynda úılerge ystyq sý berý ýaqytsha toqtatylady.
«Shyǵys Jylý» AQ málimetinshe, jylý elektr ortalyǵynyń negizgi jáne qosalqy jabdyqtaryna josparly jóndeý jumystary júrgiziledi. Soǵan baılanysty ortalyq 1-25 shilde aralyǵynda jumys istemeıdi.
— Osy kezeńde ystyq sý berý ýaqytsha toqtatylady. Budan bólek, shilde aıynda qalanyń ártúrli aýdandaryndaǵy 17 ýchaskede jylý jelilerin kúrdeli jóndeý jumystary bastalady. Bul jumystar tamyz aıynda da jalǵasady. Osyǵan baılanysty keıbir aýmaqtarda ystyq sý ýaqytsha óshiriledi. Alaıda shekteý búkil qalaǵa birdeı emes, jóndeý júrgiziletin ýchaskelerge ǵana qatysty bolady, — delingen aqparatta.
Sol sebepti shilde aıynyń 25-ne deıin Rıdderdegi úıler ystyq sýsyz qalady. Al tamyz aıynda ystyq sý tek jylý jelilerinde jóndeý jumystary júrgiziletin aýdandarda ǵana ýaqytsha toqtatylmaq.
Eske salsaq, osyǵan deıin Úkimet Rıdder qalasynyń jylýmen qamtý senimdiligin arttyrýǵa 1,8 mlrd teńge bóletindigi habarlanǵan.
