Rıdder turǵyndary aýyl ishinen qonjyq taýyp aldy

ÓSKEMEN. KAZINFORM – Shyǵys Qazaqstan oblysy Rıdder qalasynyń irgesinde ornalasqan Býtakovo aýylynyń turǵyndary aýla mańyna kirip ketken qonjyqty baıqap qalǵan.

Maımaq ań qys túsip, kún raıy sýyta bastaǵanda qalyń uıqyǵa ketpeı aýyl ishinde júrgen jerinen jurttyń kózine tústi. Aýyl turǵyny Janarbek Nubaevtyń aıtýynsha, ol qonjyqty tańerteń sıyr sýaratyn bulaqtyń janynan kórgen.

- Qonjyqty dál sýdyń janynan kórdim. Kórshim Erlandy shaqyryp, ekeýmiz saqtyqpen arqan tastap ustadyq. Ol óte ashýly, bizge umtylyp, tistemek boldy. Aıaǵynan ustap baǵanaǵa baılaýǵa týra keldi, qoraǵa kirgizý múmkin emes edi. Sorpa ishpedi, tek azdap et jedi. Eń bastysy mamandar tezirek alyp ketse eken, - dedi ol.

Turǵyndar bul eki apta buryn Rıdder trassasynyń boıyndaǵy Býtakovo mańynda júgirip júrgen qonjyq bolýy múmkin dep boljap otyr.

Jalǵyz qalǵan jabaıy janýar aıazda azyq taba almasa ómirine qaýip tónetini anyq. Qonjyq týraly aqparat ShQO orman jáne ańshylyq sharýashylyǵynyń jedel áreket etý jasaǵyna joldandy.

- Jaǵdaıdy Pıhtov orman sharýashylyǵyna jetkizdik. Ol jaqtaǵy ınspektorlar kelip, qonjyqty ýaqytsha alyp ketedi. Erteń bizdiń mamandar ony Óskemen qalasyndaǵy zoobaqqa jetkizedi, - dedi jasaq bastyǵy Ermek Baǵlanuly.

Eske salsaq, buǵan deıin Rıdderdegi qonjyq Óskemendegi zoobaqqa jetkizilgeni týraly jazǵan bolatynbyz.