Rıdder túlegi álemdegi eń uzyn «shpargalka» daıyndaǵan bolýy múmkin - BAQ
ASTANA. 8 maýsym. QazAqparat - Rıdder qalasyndaǵy mektepterdiń birinde bilim alǵan túlek UBT qarsańynda 11 metrlik «shpargalka» jasap shyǵardy. Bul álemdegi eń uzyn «shpargalka» bolýy yqtımal.
Bul týraly «Ekspress K» gazetindegi (avtor Andreı Kratenko) «Skatertıý shpargalka» atty maqalada jazyldy.
Ol usaq jazýmen skotchqa 25 myńnan astam jaýap basqan. Alaıda «shpargalka» taýyp alynyp, ádisin qoldanyp úlgere almaı qaldy.
UBT-da kóbisiniń joly bolmady. Bul «shpargalka» men uıaly telefonǵa qatysty emes. Túlekterdiń aıtýynsha, UBT kezinde kelgen suraqtar múldem beıtanys bolyp shyqqan. Bir jyl boıy daıyndalǵan testerdiń suraqtary kelmedi dep ókpe tanytýda oqýshylar. Olardyń sózderine qaraǵanda, matematıka jáne tarıh pánderi boıynsha suraqtar 90 paıyzǵa ózgertilgen. Sonyń saldarynan Shyǵys Qazaqstanda «Altyn belgi» ıegerleriniń 90 paıyzy qajetti ball jınaı almady.
- Birinshi kezekte test tapsyrǵan 33 «Altyn belgi» ıegerleriniń bireýi ǵana óz bilimin dáleldeı aldy. Óskemen boıynsha ortasha ball - 85. Kóp bala bul testileýde súrindi, - deıdi óskemendik túlekterdiń biriniń anasy.
Alaıda bilim basqarmasynyń basshysy Mádenıet Ahmetova barlyq kiná oqýshylardyń ózinde dep málimdeýde. «Oqýshylardyń ózderi kináli. Olar test suraqtaryn tek mehanıkalyq turǵyda jattap alady. Suraqtar logıkalyq turǵydan kelgen kezde olar sasqalaqtap, qalaı jaýap bererlerin bilmeı, qatelesedi», - deıdi ol.
