Rıdder-Sokolnyı ken orny kareriniń jıegin sý shaıyp ketti - turǵyndar kóshirilýde
ÓSKEMEN. QazAqparat - Rıdderde arty jylbysqy qarǵa ulasqan jaýyn-shashyn saldarynan karerdegi taý jynystary opyrylyp qulady, dep habarlaıdy «QazAqparat» HAA tilshisi BAQ-qa taratylǵan resmı aqparatqa silteme jasap.
6 mamyr kúni tústen keıin tabıǵı sý aǵyny saldarynan «Qazmyrysh» JShS Rıdder taý-ken baıytý kesheni Rıdder-Sokolnyı ken ornynyń Andreevskıı kareriniń soltústik-batys jıegin sý shaıdy.
Karer taý-ken baıytý kesheniniń tehnologııalyq aýmaǵynda ornalasqan. 350 metr jerde ornalasqan úsh úıdiń turǵyndary qaýipsizdik turǵysynda «Qazmyrysh» profılaktorııine kóshirile bastady. Olar barlyq qajetti kerek-jaraqpen qamtyldy. Al úıleri mamandandyrylǵan merdigerlik uıymnyń qorǵaýyna alyndy. Sý deńgeıi baqylanýda. Oqıǵadan eshkim zardap shekken joq.
Qazir oqıǵa ornynda arnaıy apattyq toptar jumys isteýde. Karerge jaqyn jerde energotseh pen taldaý zerthanasynyń bólimshesi bar, qaýipsizdik maqsatynda bul nysandardyń jumysy toqtatyldy.
