Rıdder prokýratýrasy qoǵamdyq qabyldaý ashty

ÓSKEMEN.QazAqparat - Rıdder prokýratýrasy erekshe bastama engizdi. Turǵyndardyń túrli aryz-shaǵymdaryna ýaqtyly jaýap berý úshin olardy vedomstvo qyzmetkerlerimen birge túrli memlekettik uıym ókilderi de qabyldaıdy, dep habarlaıdy «QazAqparat» HAA tilshisi.

Baqylaý vedomstvosynyń túsindirýinshe, olar prokýratýraǵa túsken rıdderlikterdiń aryz-shaǵymdaryn birneshe aı boıy zerttegen. Aryzdardyń kóbi memlekettik uıymdar nemese kommýnaldyq kásiporyndardyń qatysýyn  talap etetindigi anyqtaldy. Prokýratýra qala turǵyndaryna meılinshe jedel ári biliktilikpen kómek kórsetý úshin aryz-shaǵymdardyń ujymdyq qaralýyn qolǵa alýdy sheshti.

«Kóp jaǵdaıda qala turǵyndary ár memlekettik organdardyń  qyzmetin  túsinbesten, óz máselelerine jaýap izdep bir mekemeden ekinshi mekemege bara beredi,- deıdi Rıdder prokýrory Saıd Aımuhan. - Onyń sheshimi - aptasyna bir ret prokýratýrada túrli memlekettik organ qyzmetkerleri men kommýnaldyq kásiporyn ókilderi jáne t.b.  qatysýymen qoǵamdyq qabyldaý kúnin ótkizý. Prokýratýra qabyldaýǵa kelgen ár adamnyń suraǵyna jaýap berilýin qadaǵaıdy».

Qoǵamdyq qabyldaýǵa alpysqa jýyq rıdderlik kelip úlgerdi.