Rıdder men Shemonaıhaǵa dáriger jáne muǵalim mamandary jetispeıdi
ASTANA. QazAqparat - Bıyl óńirlik kvotamen bizdiń oblysqa Almaty, Jambyl, Qyzylorda, Ońtústik Qazaqstan oblystarynan kóship keletin otbasylar negizinen Rıdder, Shemonaıha qalalaryna, keıbiri aýdandarǵa qonystandyrylmaq, dep jazady altaynews.
Qazirgi kúni Rıdder men Shemonaıhada baǵdarlamaǵa qatysatyn adamdarǵa arnalyp eki kóppáterli turǵyn úı salynyp jatyr, qurylysy bıyl bitedi.
Rıdder qalasyna ásirese, muǵalimder men dárigerler qajet bolyp otyr. Shaǵyn shahardyń mektepterine án sabaǵy, aǵylshyn, tarıh, matematıka, fızıka pánderiniń muǵalimderi, balabaqsha tárbıeshileri, horeograftar, emhanaǵa narkolog, terapevt, psıhıatr taǵy da basqa mamandar kerek.
Katonqaraǵaı aýdanyna da byltyr Almaty, Ońtústik Qazaqstan oblystarynan jumyssyz otyrǵan jeti otbasy kóship kelip, jumysqa ornalasqan. Almaty oblysynan kelgen Erjan Nurekeniń otbasy qazir Katonqaraǵaı aýylynda turyp jatyr. Erjannyń jubaıy Nurdana Omar (sýrette) osy aýyldaǵy orta mektepte bastaýysh synyptarynyń muǵalimi bolyp eńbek etýde.
«Nátıjeli jumyspen qamtýdy jáne jalpyǵa birdeı kásipkerlikti damytý baǵdarlamasy boıynsha 2017 jyly bizdiń aýdanǵa 35 otbasy kóship keldi. Búgingi kúni olardyń 90 paıyzy jumys istep jatyr. Úsh otbasy aýyldarǵa qonystandy: olardyń músheleri Zevakınodaǵy medıtsınalyq áleýmettik mekemede, Vydrıha aýylyndaǵy «Ýba» shıpajaıyna jumys istep jatyr. Bizdiń jaqtyń aýyldarynda úıdiń baǵasy 500-600 myń teńge turady, aı saıyn bir jyl boıy beriletin sýbsıdııany bir ret tolyǵymen alyp, ol qarjyǵa úı satyp alǵan otbasylar da bar. Kóship kelgen otbasylardyń kópshiligi jalǵa alǵan baspanalarda turyp jatyr, jaldaý shyǵyny memleketten bólingen sýbsıdııamen tólenip otyr. Bıylǵy qyrkúıek aıynda Shemonaıha qalasynda salynyp jatqan 60 páterlik kóppáterli turǵyn úı paıdalanýǵa berilgen soń, olar sol jańa úıge qonystanady. Bıyl bizdiń aýdanǵa Almaty, Ońtústik Qazaqstan, Qyzylorda oblystarynan taǵy da 33 otbasy kóship kelmek, naqty kelisim bar. Olardyń kópshiligi muǵalimder men dárigerler, medbıkeler otbasy. Aýdan mektepterinde muǵalimder, aýrýhana, emhanada dárigerler tapshy bolyp tur, sharýashylyqtarǵa agronom, mal dárigeri de qajet. Qazirdiń ózinde Shemonaıhaǵa tórt otbasy kóship kelip qoıdy, músheleri temir jol mekemesi men mektepke ornalasty. Osy naýryzda taǵy da birneshe otbasyn kútip otyrmyz», - Shemonaıha aýdany jumyspen qamtý ortalyǵynyń dırektory Natalıa Bannıkova.
