Rıdder men Ekibastuz jylý júıesindegi apat qaıtalanýy múmkin be

ASTANA. KAZINFORM – Elimizdiń birqatar óńirinde 2021-2022 jyldary tirkelgen jylý júıesindegi apattardan keıin energetıka salasyndaǵy baqylaý kúsheıtilip, jylý elektr ortalyqtaryn jańǵyrtýǵa qomaqty qarajat bólindi. Bul týraly Energetıka mınıstrliginiń Memlekettik energetıkalyq qadaǵalaý jáne baqylaý komıtetiniń tóraǵasy Erjan Erboluly Ertaev málimdedi.

Ortalyq kommýnıkatsııalar qyzmetinde ótken baspasóz máslıhatynda jýrnalıster Ekibastuz, Rıdder jáne Stepnogorsk qalalarynda bolǵan apattardyń qaıtalanbaýyna qandaı kepil baryn surap, mundaı oqıǵalardyń aldyn alý sharalaryna qyzyǵýshylyq bildirdi. Soltústik Qazaqstan oblysynda qubyr qulaý faktisi de nazardan tys qalǵan joq.

– Qazirgi kezde jóndeý jumystary rezervtik qondyrǵylarda júrgizilip jatyr. Al Ekibastuz, Rıdder qalalarynda bolǵan oqıǵalar 2021-2022 jyldary bolǵan. Sol jaǵdaılardan keıin Úkimet tarapynan daıyndyq jumystaryna erekshe nazar aýdarylyp, memlekettik rezervten jóndeý jumystaryna qarajat bólinip jatyr. Osylaısha aýqymdy jumystar atqarylýda. Sondyqtan jylytý maýsymy apatsyz ótedi dep senemiz, - dedi Ertaev.

Onyń aıtýynsha, 2023 jyly elektr stantsııalardyń daıyndyǵyna 227 mlrd teńge bólinse, 2024 jyly bul soma 326 mlrd teńgege deıin artqan. 2025 jylǵa 396 mlrd teńge kóleminde qarjy qarastyrylǵan. 

– Bul qarajat jóndeý jumystarynyń kólemin ulǵaıtýǵa sebep bolady, - dedi komıtet basshysy.

Sonymen qatar vedomstvo ókili salada júrgizilgen taldaý nátıjelerine toqtalyp, tehnıkalyq buzýshylyqtar sanynyń aıtarlyqtaı azaıǵanyn aıtty. Atap aıtqanda, ótken jylytý maýsymynda tirkelgen aqaýlar sany 1 070-ten 782-ge deıin qysqaryp, 27 paıyzǵa tómendegen. Al, 2025 jyldyń alǵashqy segiz aıynda bul kórsetkish ótken jyldyń sáıkes kezeńimen salystyrǵanda taǵy 12 paıyzǵa azaıyp, 1 054 jaǵdaıdy quraǵan. 

Sondaı-aq energııa kózderindegi temperatýralyq rejımniń saqtalmaýyna qatysty buzýshylyqtar úsh esege azaıǵan. 

Jylytý maýsymynyń bastalýyna qatysty suraqqa jaýap bergen vedomstvo ókili Astanada bul másele aýa raıyna baılanysty sheshiletinin jetkizdi.

– Ákimshilik sheshimge sáıkes, syrtqy aýa temperatýrasy +10 gradýstan tómen úsh táýlik qatarynan saqtalǵan jaǵdaıda, qala ákimdigi tıisti sheshim qabyldap, jylý maýsymyn bastaıdy, - dedi Ertaev.

Eske sala keteıik, Oljas Bektenov jylytý maýsymyna daıyn emes óńir ákimderine eskertý jasaǵan.