Rıdder: Qutqarýshylar Úlbi ózeninen áıeldiń denesin izdep jatyr
ÓSKEMEN. QazAqparat - Rıdderde qutqarýshylar Úlbi ózenine aǵyp ketti degen boljammen áıeldi izdep jatyr, dep habarlaıdy QazAqparat ShQO TJD-ǵa silteme jasap.
Kýágerlerdiń aıtýynsha, 50 jastaǵy áıel beımálim jaǵdaıda aǵyp ketken. Іzdeý jumystaryna Óskemen qalasyndaǵy Shyǵys óńirlik aeroutqyr jedel qutqarý jasaǵynyń qutqarýshylar toby tartyldy.
Sondaı-aq, Zyrıan aýdanynda 8-shi Shyǵys óńirlik aeroutqyr jedel qutqarý jasaǵynyń qutqarýshylar toby Maleevsk kentinde Buqtyrma ózenine aǵyp ketken 36 jastaǵy er adamnyń denesin tapty. Er adam jeksenbi kúni belgilenbegen jerde sýǵa túsken. Kóptegen sýǵa shomylýshylar osy sebepti jáne alkogoldik ishimdik ishýine baılanysty sýǵa aǵyp ketedi. Sýǵa aǵyp ketkenderdiń 80% belgilenbegen orynda mas kúıinde sýǵa túsken.
ShQO-da shomylý maýsymy bastalǵaly 6 adam sýǵa batyp ketken. ShQO TJD qutqarýshylary azamattardy abaı bolýǵa jáne belgisiz jerde shomylmaýǵa shaqyrýda.
