Rıdder kóshelerine aıýdyń jıi kirýine baılanysty halyqqa eskertý jasaldy

ÓSKEMEN. KAZINFORM – Shyǵys Qazaqstan oblysy Rıdder qalasynyń kóshelerine aıýdyń qaıta-qaıta kirip ketýine baılanysty halyqqa eskertý jasaldy.

Qazirgi ýaqytta Rıdderge ShQO Tabıǵı resýrstar jáne tabıǵat paıdalanýdy retteý basqarmasyna qarasty Orman jáne ańshylyq sharýashylyǵynyń jedel áreket etý toby keldi. Olar qala mańyndaǵy orman alqaptaryn jáne eldi mekenniń shetin bir apta boıy tekserip, jaǵdaıdy baǵalamaq.

- Sońǵy ýaqytta jabaıy ańdardyń, sonyń ishinde aıýlardyń qala ishine jaqyndaýy jıilep ketti. Osyǵan baılanysty azamattardyń qaýipsizdigin qamtamasyz etý úshin barlyq qajetti sharalar qabyldanyp jatyr, - dep habarlady Rıdder qalasy ákimdiginen.

Ákimdik turǵyndardy sabyr saqtaýǵa, jalǵan nemese rastalmaǵan aqparat taratpaýǵa, al túz taǵysyn kórgen jaǵdaıda dereý tıisti qyzmetterge habarlaýǵa shaqyrdy.

- Dúrbeleńge salynýdyń qajeti joq. Jaǵdaı jergilikti atqarýshy organdar men quzyrly qyzmetterdiń turaqty baqylaýyna alynǵan. Jedel áreket etý toby mamandarynyń jumysy aıaqtalǵannan keıin jaǵdaıǵa resmı baǵa berilip, odan arǵy áreketter týraly habarlanady, - delingen aqparatta.

Eske salsaq, osyǵan deıin Rıdder qalasynyń kóshelerine aıý kirip ketkeni habarlanǵan.