Rıdder kóshelerin sý basty
ÓSKEMEN. QazAqparat - Shyǵys Qazaqstanda qyzyl sý eldi mekenderdiń mazasyn qashyrýda, dep habarlaıdy QazAqparat tilshisi.
Ótken aptada Glýbokoe aýdanynyń eki aýylyna Ertistiń sýy jaıylsa, osy aptada Rıdder qalasynda bastaýdyń sýy kósheni basyp qaldy.
Qar qalyń jaýǵan jyldary bar-joǵy bilinbeı jatatyn bulaqtar bıylǵy qysta jurttyń mazasyn alýda. Juqa qar men aıaz shaǵyn bastaýdyń arnasyna muz keptep, Rıdder qalasynyń shetki aýdanyna eldi mekenderge qyzyl sý jaıyldy. Zavodskaıa kóshesindegi jer úıdiń aýlasyna jaıylǵan muz birneshe kúnniń ishinde bir metrlik tońǵa aınalǵan. Turǵyndar kún kúrt jylynǵan jaǵdaıda mańaıdaǵy bes úıge sý jaıylý qaýpi tónedi dep otyr. Muz qursaýynda qalǵan Valentına Shakernıazovanyń aýlasyn eriktiler jasaǵy men tótenshe jaǵdaı qyzmetkerleri arshýda.
«Kún saıyn muz qalyńdap jatyr. Esik aldy muz aıdynnan aýmaı qaldy», - deıdi úı ıesi.
Qazir qyzyl sýdyń beti qaıtqan. Al joldy alyp qalǵan muz tótenshe jaǵdaı qyzmetkerleriniń jumystaryna qıynshylyq týdyrýda. Ázirge joldyń muz basqan bóligine kúl sebýden basqa amal tappaı otyr.
«Vodokanal» mekemesi Zavodskaıa kóshesiniń turǵyndaryna kómek retinde sý tasıtyn kólik jiberipti. Sonymen qaınaǵan sý tasyp, bulaqtyń muz keptelgen bóligin eritken. Biraq túnniń sýyǵynda sý qaıta kóterilip, aýlaǵa jaıylýmen bolǵan
«Aqyry bastaýdyń arnasyn traktordyń kómegimen jyryp shyqtyq. Sodan keıin ǵana sý arnasymen aǵa bastady. Degenmen, qalyń muzdyń bárin oıyp alý múmkin emes. Kún sál jylynǵan kezde tehnıka jiberip, syrtqa tasyp tastaımyz», - deıdi qalalyq ákimdiktiń bas mamany Aslan Muhanov.
Eske sala keteıik, Ertisten shyqqan qyzyl sý Glýbokoe aýdanynyń eki aýylyna jaıylǵanyn buǵan deıin jazǵan bolatynbyz.
