Rıdder qalasyndaǵy tótenshe jaǵdaı rejımi alynady – Danıal Ahmetov

ÓSKEMEN. QazAqparat – Rıdderde jylý elektr ortalǵyndaǵy apatqa baılanysty jarııalanǵan tehnogendik sıpattaǵy tótenshe jaǵdaı rejımi alynady. Bul týraly Shyǵys Qazaqstan oblysynyń ákimi Danıal Ahmetov óziniń áleýmettik jelidegi paraqshasynda jazdy, dep habarlaıdy QazAqparat tilshisi.

«Rıdder jylý elektr ortalyǵynyń jańa ınvestorlarymen kezdesý ótkizdim. 10 kún ishinde jylý ortalyǵynyń jańa ıeleri jóndeý jumystarynyń tolyq kestesin usynýmen qatar, qajetti jabdyqtar men komponentterdiń, mamandardyń tizimi men sanyn kórsetýi qajet. Tórtinshi jáne besinshi qazandyqtarǵa, kómir berýdiń rezervtik traktisine, órtten zardap shekken ortalyq ǵımaratynyń ózine erekshe nazar aýdarýy shart. Barlyq jabdyqtar men jeliler kúrdeli jóndeýdi qajet etedi», - dep jazdy óńir ákimi óziniń Іnstagram paraqshasynda.

Danıal Ahmetov qıyn jaǵdaıda dúrbeleńge salynbaı, túsinistik tanytqan Rıdder qalasynyń turǵyndaryna alǵys bildirdi. Sonymen qatar, shahardaǵy tótenshe jaǵdaı rejımi alynyp tastalatynyn málimdedi.

«Rıdder qalasy ákimine jylý elektr ortalyǵy toqtaýsyz istep turýyna baılanysty jergilikti aýqymdaǵy tehnogendik sıpattaǵy tótenshe jaǵdaı rejımin alyp tastaýǵa tapsyrma berdim», - dep túıindedi oblys basshysy.

Eske sala keteıik, byltyr 7 qarashada Rıdder qalasyndaǵy jylý elektr ortalyǵynda apat bolyp, 22 myńnan astam abonentke úshin jylý berý azaıtylǵan edi. Osy jaǵdaıdan keıin shaharda jergilikti aýqymda tótenshe jaǵdaı jarııalanǵan bolatyn.