Rıdder qalasyndaǵy mektep órtendi
ÓSKEMEN. QazAqparat – Shyǵys Qazaqstan oblysy Rıdder qalasyndaǵy mektepte órt shyqty, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 7 qarasha kúni tańǵy saǵat 4:00 shamasynda T.Toqtarov kóshesindegi eki qabatty orta mektep ǵımaratynda órt shyqqan. Birinshi qabattaǵy bólmede shyqqan qyzyl jalyn esikti, edendi, tereze blogyn, jıhazdy, kompıýter men ınteraktıvti taqtany sharpyǵan. Órt sóndirýshilerdiń jedel áreketiniń arqasynda 12 sharshy metr aýmaqtaǵy tilsiz jaý aýyzdyqtaldy. Eshkim zardap shekken joq.
«Órttiń shyǵý sebebi – elektr jabdyqtaryn montajdaý jáne paıdalaný kezinde qaýipsizdik erejesin saqtamaýdan nemese elektr jabdyqtarynyń apattyq rejımi sebep bolýy múmkin. Jalyndy óshirýge 2 órt sóndirý kóligi men 7 qutqarýshy jumyldyryldy», - dep habarlady vedomstvo ókilderi.
Osy rette, TJD turǵyndarǵa órt qaýipsizdigi erejelerin qatań saqtaý qajettigin eskertedi.
