Rıdder qalasynda qubyr jarylyp, kanaldaǵy sý deńgeıi kóterildi
RIDDER. QazAqparat - Shyǵys Qazaqstan oblysynyń Rıdder qalasynda derıvatsııalyq qubyr jaryldy, dep habarlaıdy QazAqparat Tótenshe jaǵdaılar komıtetiniń baspasóz qyzmetine silteme jasap.
6 jeltoqsan saǵat 10:38-de Rıdder qalasynda «GES LK» JShS qubyry jaryldy.
«Seriktestiktiń derıvatsııalyq qubyrynyń jarylýyna baılanysty Tıhaıa ózenine quıatyn uzyndyǵy 5 shaqyrymdyq óndiristik kanalǵa sý jiberildi. Qubyrdyń jarylý saldarynan kanaldaǵy sý deńgeıi shamamen 1 metrge kóterildi. «GES LK» JShS jáne Rıdder qalasynyń tótenshe jaǵdaılar basqarmasy qyzmetkerleri arnanyń tómengi núktelerinde baqylaý beketterine bólinip, jaǵdaıdy qadaǵalap otyr» delingen habarlamada.
Tótenshe jaǵdaılar komıteti baspasóz qyzmetiniń málimetinshe, gıdroelektr stansalarynyń qyzmetkerleri apatty joıý jáne sýdy Gomatýha ózenine qaıta bólý jumysyn júrgizip jatyr.
Qazirgi ýaqytta sý deńgeıi tómendep keledi. Jaqyn ornalasqan jeke turǵyn úılerdi sý basý qaýpi joq. Rıdder qalasynda sý, jylý jáne elektr energııasy ádettegi rejımde berilýde.
