Rıdder qalasynda 40 jastaǵy er adam sýǵa ketti
NUR-SULTAN. QazAqparat – Rıdder qalasyndaǵy jasandy sý aıdyny jaǵasynda demalyp júrgen er adam sýǵa batyp ketti, dep habarlaıdy QazAqparat agenttigi.
22 shilde kúni Leshoz aýdanyndaǵy jasandy sý aıdyny jaǵasynda demalyp júrgen 1980 jyly týǵan er adam shomylmaq bolǵan. Sýǵa kirgen sátte kenet sý astyna ketip, shyǵa almaǵan. Іzdestirý úshin oqıǵa ornyna qalalyq arnaıy órt sóndirý bóliminiń qyzmetkerleri jetti, biraq deneni taba almady.
Sodan keıin olar oblystyq TJD jedel-qutqarý jasaǵynyń kómegine júgingen. Olar sýǵa túsip, batyp ketken adamdy 2 saǵattaı izdegen. Sýdyń qatty laılanýy men tereńdiginiń 3 metrden 5 metrge deıin jetýi izdeý jumystaryn qıyndatty.
TJD qyzmetshileri máıitti jaǵadan 15 metr qashyqtyqta, 4-5 metr tereńdikten taýyp, polıtsııa qyzmetkerlerine tapsyrdy.
Bıylǵy shomylý maýsymynda oblysta 23 adam sýǵa ketti, onyń segizi - 17 jasqa tolmaǵan balalar.
Oblysta adamdardyń sýǵa batyp ketip jatqanynyń negizgi sebebi – shomylýǵa arnalmaǵan jerlerde sýǵa túsý, óz shamasyn bilmeý jáne balalardyń eresekterdiń qaraýynsyz shomylýy.
Sýǵa batyp ketkenderdiń kóbi mas bolǵan.
