Rıdder qalasynyń kóshelerine aıý kirip ketti
ÓSKEMEN.KAZINFORM — Shyǵys Qazaqstan oblysy Rıdder qalasynyń kóshelerinde aıýdyń júrgeni jaıly vıdeo tarady.
Jelide taraǵan vıdeoda aıýdyń kóshe joldaryn kezip júrgenin kórýge bolady. Tipti jer úılerdiń mańyna taıap ta barǵan.
Osyǵan qatysty «Rıdder orman sharýashylyǵy» mekemesinen túsinikteme berdi.
— Rıdderdegi aıý sany burynnan beri kóp bolǵan. Sebebi onyń sanyn retteý júrgizilmeıdi. Osy jyly aıýlardyń eldi mekenderge jıi shyǵýynyń basty sebebi — ormanda qorektiń bolmaýy. Kóktemdegi aıaz saldarynan jıdek shyqpady. Shıe, qaraqat joq. Sondyqtan aıýlar dalada kúnbaǵys jep, qala ishindegi qoqys jáshikterine túse bastady. Eger aıý maı jınaı almasa, qysta uıqyǵa ketpeıdi nemese erte oıanyp ketýi múmkin. Al bul óte qaýipti, — delingen aqparatta.
Eske salsaq, osyǵan deıin Shyǵys Qazaqstan oblysyndaǵy Serebrıansk qalasynda aıý ortalyq alańǵa deıin kirip ketkeni habarlanǵan.