Rıdder qalasynyń ákimi qyzmetinen ketti

ÓSKEMEN. KAZINFORM — Shyǵys Qazaqstan oblysy Rıdder qalasynyń ákimi Dáýlet Batyrbaev óz erkimen qyzmetinen ketti.

Dáýlet Batyrbaev ótken jyldyń tamyz aıynda Rıdder qalasynyń ákimi bolyp taǵaıyndalǵan.  

— Az ýaqyt ishinde kóp sharýany iske asyra aldyq. Qalany jylytýǵa qatysty kúrdeli máselelerge tótep berip, eki jańa mektep saldyq. Turǵyn úıler men kásiporyndardan erigen qar sýyn burý boıynsha jumystardy oıdaǵydaı júrgizdik. Qoǵamdyq kólikterdiń sylbyr júrýi máselesi de retteldi. Qalada mádenı-oıyn-saýyq pen buqaralyq sport jandandy, — dedi Dáýlet Batyrbaev.

Óz sózinde ol áleýmettik jelide jarııalanǵan synı jazbalar qala turǵyndarynyń problemalaryn tez sheshýge yqpal etkenin jetkizdi.

Al jumystan ketý sebebin otbasylyq jaǵdaılarǵa baılanysty dep túsindirdi.

Aıta keteıik, endi ázirshe qala ákiminiń orynbasary bolǵan Murat Baıjúmenov qala basshysynyń mindetin ýaqytsha atqarmaq.