Rıdder qalasynda jumys ýaqyty bir saǵatqa shegerildi

ÓSKEMEN. KAZINFORM – Shyǵys Qazaqstan oblysyndaǵy Rıdder qalasynda jumys ýaqyty endi saǵat 08.00-de bastalady.

Kenshiler shaharynda memlekettik mekemeler, kásiporyndar jáne áleýmettik qyzmetter úshin jumys kestesi ózgerdi. Endi jumys kúni saǵat 08:00-den 17:30-ǵa deıin jalǵasady. Al túski úzilis 12:00-den 13:30-ǵa deıin belgilendi.

Demek, osyndaı jańashyldyq oblystaǵy 13 qala, aýdannyń 12-sinde engizildi. Bul bastama eńbek úderisterin ońtaılandyrýǵa jáne aımaqtyń klımattyq jaǵdaılaryn eskere otyryp, jumys tıimdiligin arttyrýǵa baǵyttalǵan. Alaıda bul ózgeris mektepterdiń, balabaqshalardyń jáne medıtsınalyq mekemelerdiń jumysyna áser etken joq.

Rıdderlikterdiń pikirinshe, jańa jumys kestesi yńǵaıly.

- Bul – durys jáne ýaqtyly sheshim. Birinshiden, tańerteń qarańǵyda jumysqa barmaıtyn boldyq. Ekinshiden, tańǵy ýaqytta ónimdilik joǵary, jumys isteý jeńilirek ári jyldamyraq, - deıdi qala turǵyny Lıazzat Shaıahmetova.

Rıdder qalasy ákiminiń orynbasary Bolat Akýjanov jańa jumys kestesi turǵyndarmen muqııat talqylanǵanyn atap ótti.

- Biz jergilikti halyqpen birqatar kezdesý ótkizip, bul máseleni jiti talqyladyq. Qala turǵyndary bastamany qoldady, - deıdi ol.

Eske salsaq, buǵan deıin Katonqaraǵaı aýdanynda jumys ýaqyty bir saǵatqa keri shegerilgeni habarlanǵan. 

Keıin taǵy birneshe aýdanda jumys ýaqyty ózgertildi.

12 naýryzda Altaı jáne Ulan aýdandarynda da jumys ýaqyty saǵat 08.00-de bastalatyndyǵy habarlandy.

Keshe osyndaı ózgeris Glýbokoe jáne Shemonaıha aýdandarynda jasaldy.