Rıdder halqynan keshirim suraımyn – Danıal Ahmetov

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov Rıdder jylý elektr ortalyǵyndaǵy aqaýlar men apattardan úıleri qaıta-qaıta sýyp ketip otyrǵan turǵyndardan keshirim surady, dep habarlaıdy QazAqparat tilshisi.

ShQO ákimdiginiń málimetinshe, aımaq basshysy Danıal Ahmetov Rıdder qalasyna baryp, jylý elektr ortalyǵyndaǵy ahýalmen tanysty.

«Ortalyq basshylyǵynyń jaýapsyzdyǵynan osyndaı oqıǵalar bolyp jatyr. Olar 4 jyl boıy eshteńe istemegen. Memlekettik organdardy jalǵan anyqtamalarmen aldap keldi. Byltyr qarasha aıynda alǵash ret apat bolǵan kezde biz basqa kásiporyndar men jylý elektr ortalyqtarynan 160 mamandy tartyp, qalpyna keltirý jumysyn qolǵa aldyq. Óte múshkil halde bolǵan joǵary qysymdy 2 qazandyqty qysqa ýaqyt úshinde jóndep shyǵardyq», - deıdi oblys ákimi.

Onyń aıtýynsha, JEO ıeleri bul qazandyqtardy jóndeýdi múlde oılamaǵan. Tipti olar kómir aqysyn tóleýden de bas tartqan. Soǵan qaramastan Qarajyra ken orny ákimdik kepildigimen kómir jetkizýdi toqtatpady. Qazir ortalyqtyń kómir úshin qaryzy 1 mlrd 350 mln teńgeni quraǵan.

«Jylý temperatýrasy tómendep ketkeni úshin Rıdder halqynan keshirim suraımyn. Bul turǵyndar úshin tikeleı mańyzdy osyndaı nysan ıeleriniń olqylyqtaryna jol berip otyrǵan zańdaǵy kemshilikterden týyndady deýge de bolady. Prezıdenttiń tapsyrmasymen quzyrly mınıstrlik tarapynan zańǵa ózgerister engizilip, bizge JEO jumystaryn talapqa sáıkes baqylaýǵa múmkindik bolady dep senemin», - dedi Danıal Ahmetov.

Eske salsaq, keshe Rıdderdegi jylý elektr ortalyǵynan órt shyqqan bolatyn.

Qyzyl jalyn birneshe saǵatta aýyzdyqtaldy.

Otqa oranǵan kómir tsehy úsh kúnde qalpyna keltiriletindigi habarlandy.

Qazir jylý elektr ortalyǵynyń basshylyǵyna qatysty tergeý júrgizilip jatyr.

Kadry ız vıdeo