Rıdder baraq úı órtenip bir er adam qaza tapty
ÓSKEMEN. QazAqparat - Búgin tańerteń Rıdderde aǵashtan salynǵan barak úıdiń shatyry órtke oranyp, 10 páter ıesi zardap shekti.
Turǵyndardyń kópshiligi - beıáleýmettik ómir saltyn ustanatyn egde adamdar. Tazalyq pen órt qaýipsizdigi talaptaryn saqtaýǵa kóńil bólmegen, dep atap ótti ShQO TJD.
Órt tóbe jabyndysynan bastalǵan. Aǵash tez órtenip, birden 4 páterge zaqym kelgen. Oqıǵany kórgender órt sóndirýshilerge qońyraý shalǵan. Olar 4 mınýtta oqıǵa ornyna jetken, ol kezde jalyn ǵımarattyń shatyryna tolyqtaı jaıylyp úlgerdi.
Qutqarýshylar adamdardy qutqarý úshin birden úıdiń ishin aralap shyqty. Órtke oranǵan bir páterden er adamnyń múrdesi tabyldy, onyń kim ekeni anyqtalýda. Qalǵan turǵyndar zardap shekken joq. Órt sóndirý kezinde qutqarýshylar syrtqa 5 gaz ballonyn alyp shyqty.
Jalyndy oqshaýlaýǵa bir saǵattaı ýaqyt ketti. Tilsiz jaý 360 sharshy metrdi sharpydy. Órtti sóndirýge 19 adam, 4 arnaıy tehnıka jumyldyryldy.
Qutqarýshylar tótenshe oqıǵanyń órtti durys paıdalanbaý saldarynan shyqty degen nusqany tekserýde.
