Rıdder avtobýstarynda elektrondy bıletteý júıesi engiziledi

ÓSKEMEN. KAZINFORM — Shyǵys Qazaqstan oblysynyń taǵy bir qalasyndaǵy avtobýstarda elektrondy bıletteý júıesi engiziledi.

Buǵan deıin Rıdderdegi qoǵamdyq kólikterde elektrondy bıletteý júıesin iske qosý jumystaryn júrgizgen kompanııa óz jumysyn toqtatqan bolatyn. Búginde sol jumysty jalǵastyratyn jańa operator anyqtaldy. 

Endi jolaýshylar jolaqyny elektrondy kartalar arqyly tóleı alatyn bolady. Bul týraly qalalyq TÚKSh, jolaýshy kóligi jáne avtomobıl joldary bóliminen málim etti. 

— Semeı qalasyndaǵy «Smart City» kompanııasymen elektrondy bıletteýdi engizý týraly kelisimshartqa qol qoıdyq. Erteńnen bastap júıeni ornatý jumystary bastalady. Avtobýstarǵa valıdatorlar ornatylyp jatyr. Kartamen tóleý baǵasy — 130 teńge. Áleýmettik sanattaǵy azamattarǵa jeńildikter qarastyrylady, — delingen aqparatta. 

Jospar boıynsha osy aptanyń sońynda elektrondy bıletteý júıesi iske qosylady. 
Eske salsaq, osyǵan deıin Astanada úsh jańa avtobýs baǵdary iske qosylatyndyǵy habarlanǵan.