«Rıdder-Astana» poıyzy aýa raıyna baılanysty 4 saǵatqa keshigip jatyr
ASTANA. QazAqparat - Aýa raıynyń qolaısyzdyǵyna baılanysty «Jolaýshylar tasymaly» AQ-nyń «Rıdder-Astana-NJ» baǵytyndaǵy №375 jolaýshylar poıyzy ýaqytynan keshiktirildi, dep habarlaıdy QazAqparat tilshisi «Jolaýshylar tasymaly» AQ baspasóz qyzmetine silteme jasap.
Qazirgi ýaqytta «Jolaýshylar tasymaly» aktsıonerlik qoǵamy «QTJ» UK» AQ jáne qyzmet kórsetýshi «PatentesTalgo» servıstik kompanııasynyń qurylymdyq bólimshelerimen birlese otyryp, aqaýdy joıý jáne jol qozǵalysy qaýipsizdigin qamtamasyz etý úshin qajetti sharalardy qabyldaýda.
Atalmysh poıyzda jolaýshylar úshin qolaıly jaǵdaı jasalǵan. Atap aıtqanda, poıyzda jolaýshylarǵa tegin tamaq berilip, temperatýralyq rejim qalypqa keltirilgen.
Qazirgi ýaqytta «Astana-Nurly jol» stansasyna kelýdiń boljaldy kidirisi - 4 saǵat dep eseptelip otyr. Degenmen, kesteden aýytqý ýaqytyn azaıtý úshin tıisti jumys júrgizilip jatyr.
Poıyzdyń keshikkeni týraly aqparat vokzaldardyń daýys ulǵaıtqyshtary men anyqtama bólimsheleri arqyly taratylyp jatyr.
Tasymaldaý erejeleri sheńberinde jolaýshylar keshiktirilgen ár saǵat úshin bılet baǵasynyń 3 paıyzy mólsherinde ótemaqy ala alady. Bolmasa jolaýshylarǵa poıyzben jol júrýden bas tartyp, bılet baǵasynyń 100 paıyzyn qaıtarý múmkindigi de qarastyrylǵan. Ol úshin taǵaıyndalǵan stansaǵa kelgennen keıin kezekshiden poıyzdyń keshikkeni týraly habarlamany ala otyryp, osy qaǵazben «Jolaýshylar tasymaly» AQ-nyń tólem kassasyna barýǵa bolady.
