Rıdder ákiminiń orynbasary qaqqan jigittiń ákesine shabýyl jasaǵandar izdestirilýde
ÓSKEMEN. QazAqparat - Jol-kólik oqıǵasynan qaza tapqan 18 jastaǵy Evgenıı Smolnıkovtiń ákesine shabýyl jasaǵan adamdar áli tabylmady. Bul týraly Rıdder polıtsııasy málim etti, dep habarlaıdy QazAqparat tilshisi.
«Maýsymnyń 22-inen 23-ine qaraǵan túni Rıdder qalasynyń Іshki ister bólimine aýrýhanadan jaraqattanǵan adam týraly habar tústi. Jaǵdaıdy anyqtaý kezinde Smolnıkov V.P. Rıdder qalasyndaǵy Belınskıı kóshesiniń boıynda ornalasqan úıdiń kire berisinde belgisiz bireýler oǵan shabýyl jasaǵanyn aıtyp, aryz jazdy», - delingen ShQO Іshki ister departamentiniń baspasóz qyzmetiniń resmı habarlamasynda.
«Atalmysh oqıǵaǵa qatysty QR QK-niń 293-baby 1-bóligi boıynsha sotqa deıingi tergeý amaldary bastaldy. Qajetti jedel-izdestirý jáne tergeý sharalary júrgizilip jatyr», - dedi polıtseıler.
Eske salaıyq, Rıdder qalasy ákiminiń burynǵy orynbasary Baýyrjan Qurmanbaev Vıktor Smolnıkovtyń uly Evgenııdi kólikpen qaǵyp ketip, ol ajal qushqan bolatyn. Jaqynda ótken sot otyrysynda Vıktor Smolnıkov Qurmanbaevty bas bostandyǵynan aıyrmaýdy surady. Qos tarapqa protsessýaldyq kelisimge kelý usynysy jasaldy.
