Rybakınanyń bapkerin jumysynan shettetý týraly jańa málimetter shyqty

ASTANA. KAZINFORM – Ulybrıtanııalyq The Athletic basylymy Áıelder tennısi qaýymdastyǵynyń (WTA) qazaqstandyq tennısshi Elena Rybakınanyń bapkeri, horvatııalyq Stefano Výkovqa qatysty tekserý qorytyndylaryn jarııa etti. 

Basylym málimetine qaraǵanda, Výkovtyń shettetilýi bir jylǵa sozylady.

Horvatııalyq mamannyń Rybakınaǵa psıhıkalyq jáne kúsh kórsetý qysymyn jasaǵany aıtyldy. Bul tennısshiniń únemi aýyryp qalýyna da sebep bolǵan.

Výkov qazaqstandyq sportshyny «mısyz» dep atap, «Eger ózi bolmasa, Elena Reseıde kartop jınap júrer edi» dep kemsitken. Budan bólek, Australian Open chempıonaty kezinde Výkov pen Rybakınanyń Melbýrnda bir bólmede turǵany habarlanǵan.

2024 jyly Rybakınanyń Výkovpen qosh aıtysqany belgili boldy. Sodan keıin Stefano ádep kodeksin buzǵany úshin WTA jumysynan shettetildi. Elena WTA qorytyndy týrnırine deıin bapkersiz qaldy. Keıin ony Goran Ivanıshevıch jattyqtyrdy. Alaıda 2025 jyly qańtarda tennısshi Výkovty komandasyna qaıta qosty. Al sol aıda Ivanıshevıchpen qarym-qatynas toqtatyldy. 

Qazirgi kezde Elena Rybakınany ıtalııalyq maman Davıde Sangvınettı baptap júr.

Búgin Doha (Qatar) WTA 1 000 týrnıriniń úshinshi aınalymynda Elena Rybakına álemniń 46-raketkasy, slovakııalyq Rebekka Shramkovamen kortqa shyǵady. R.Shramkova ekinshi aınalymda álemniń 15-raketkasy, reseılik Mırra Andreevany 3:6, 6:3, 7:5 esebimen jeńip, jarys jolynan taıdyrdy.

Eske sala keteıik, budan buryn Elenanyń jańa bapkeri jóninde jarııa etkenin jazǵan edik. Sondaı-aq Rybakına Doha týrnıriniń úshinshi aınalymyna shyqty.

Aleksandr Býblık Marsel týrnırinde ótken jylǵy chempıonmen kezdesedi.