Rybakınaǵa álemniń birinshi raketkasy bolýǵa ne kedergi

ASTANA. KAZINFORM – Álemniń tórtinshi raketkasy, qazaqstandyq Elena Rybakına álemniń birinshi raketkasy ataný múmkindigi týraly aıtty.

Rybakınanyń buǵan deıingi WTA reıtıngisindegi eń joǵary nátıjesi úshinshi oryn (2023 jyldyń maýsymynda) ekenin atap ótken jón. Qazirgi ýaqytta álemniń birinshi raketkasy – polıak tennısshisi Iga Shventek. Ekinshi orynǵa belarýs Arına Sobolenka jaıǵassa, amerıkalyq Korı Gaýff úzdik úshtikti túıindep tur.

Rybakına álemniń birinshi raketkasy atanýǵa tek óziniń sheberligi ǵana emes, qarsylastarynyń da daıyndyǵy mańyzdy ról atqaratynyn atap ótti.

«Men mańyzdy sátterde berik bolýǵa tyrysamyn. Arına nemese Igaǵa qarsy matchtarda barlyǵyn oıyn sátteri sheshedi. Olarmen kezdesý árqashan qıyn. Olar da keremet óner kórsetedi. Bul – jarys», - dedi qazaqstandyq tennısshi Rolan Garros týrnırindegi baspasóz máslıhatynda.

Sondaı-aq, Elena qaı Úlken dýlyǵa týrnırin unatatynyn aıtty.

«Múmkin Ýımbldon. Bul – basty jetistik. Kez kelgen Úlken dýlyǵa týrnıri stadıon lyq toly bolǵan kezde tańǵaldyrady. Biraq men Ýımbldondy bala kezimnen armandadym», - dedi Rybakına.

Esterińizge salsaq, Qazaqstannyń birinshi raketkasy Elena Rybakına Rolan Garros týrnıriniń shırek fınalyna shyqty. Ol Fılıpp Shatre kortynda dúnıejúzilik reıtıngide 2017 jyly úshinshi orynǵa deıin kóterilgen, qazir 19-satyda turǵan ýkraınalyq Elına Svıtolınadan basym túsken bolatyn.