Rybakına WTA qorytyndy týrnırin utqan alǵashqy azııalyq tennısshi atandy

ASTANA. KAZINFORM — Qazaqstannyń birinshi, álemniń 6-raketkasy Elena Rybakına búgin Er-Rııad qalasynda (Saýd Arabııasy) WTA qorytyndy týrnırinde úzdik shyqty.

Qazaqstandyq tennısshi fınalda álemniń 1-raketkasy, «Úlken dýlyǵa» týrnıriniń tórt dúrkin jeńimpazy, Belarýs ókili Arına Sobolenkomen chempıondyq ataqty sarapqa saldy.

Birinshi partııada esep 3:2 bolǵan mezette Rybakına breık jasap, sol basymdylyǵyn saqtap qaldy – 6:3. 

Tartysty órbigen ekinshi sette taı-breıkte E.Rybakına bet qaratpady – 7:6 (7:0).

Bir saǵat 48 mınýtqa sozylǵan básekede Rybakına 13 eıspen birge 6 breık-poınttyń bireýin óz esebine jazdy. Sobolenko 5 eıs jasaǵanymen, 5 breık-poıntty paıdalana almady. 

Osylaısha, E.Rybakına atalmysh jarys 1972 jyly uıymdastyrylǵannan beri chempıon atanǵan alǵashqy azııalyq tennısshi atandy. Buǵan deıin qytaılyqtar Lı Na (2013 jyly) men Chjen Tsınven (2024) tek fınalǵa deıin jetken edi.

Doda barysynda barlyq kezdesýinde jeńiske jetken Elena 1 500 reıtıngilik upaıǵa qosa 5,235 mln dollar (2,747 mlrd teńge) tabys tapty. Oǵan qosa dúısenbide jańartylatyn WTA reıtıngisinde 5-orynǵa kóteriledi.

Sonymen qatar E.Rybakına 2016 jyldan beri eıs sanyn 500-den asyrǵan birinshi tennısshi boldy. 2016 jyly mundaı nátıjege chehııalyq Karolına Plıshkova qol jetkizgen edi. 

Budan bólek, Elena bıylǵy maýsymda TOP-10-ǵa kiretin 7 tennısshini qapy qaldyryp, bul jóninen úzdik shyqty. Rybakına sporttyq jolynda Ýımbldondaǵy jeńisin qosqanda, WTA dodalarynda 11 tıtýl jeńip aldy. Mundaı mejege Qazaqstannan eshkim jetken emes. 

Eske sala keteıik, budan buryn Elena Rybakınanyń WTA qorytyndy týrnıriniń fınalyna shyqqanyn jazǵan edik. 

Sondaı-aq WTA qorytyndy týrnırinde Elena Rybakına fınalda álemniń 1-raketkasyn uta ala ma, bul da habarlandy.