Rybakına Qazaqstan namysyn qorǵaý úshin ózi chempıon bolǵan jarysqa qatyspaıdy
ASTANA. KAZINFORM – Qazaqstannyń birinshi, álemniń 8-raketkasy Elena Rybakına Shtýtgart (Germanııa) WTA 500 týrnırinde ótken jylǵy chempıondyq ataǵyn qorǵaı almaıdy.
Elimizdiń kóshbasshy tennısshisi onyń ornyna Billie Jean King Cup komandalyq álem chempıonatynda Qazaqstan namysyn qorǵaıdy.
Germanııadaǵy aıtýly dodada alǵashqy ondyqqa kiretin Elena Rybakına men amerıkalyq Medıson Kızden basqa mańdaıaldy tennısshilerdiń bári baq synaıdy.
Shtýtgart jarysy 14-21 sáýirde ótedi. Oǵan qatyspaǵandyqtan, E.Rybakına reıtıngilik 500 upaıynan aıyrylady. Soǵan qaramastan, tennısshi Qazaqstan quramasyna kómektesýdi jón kórdi.
Eske sala keteıik, budan buryn Bıllı Djın Kıng kýbogynda Elena Rybakına bastaǵan tennısshilerdiń el namysyn qorǵaıtynyn jazǵan bolatynbyz.
Qazaqstan quramasy D tobynda 10 sáýirde Aýstralııamen, bir kúnnen keıin Kolýmbııamen synǵa túsedi.