«RG Brands Kazakhstan» ónim eksportyn arttyrmaq

ASTANA. QazAqparat - «Qazaqstannyń Damý Banki» AQ «RG Brands Kazakhstan» JShS úshin 3 mlrd. teńge kóleminde 39 aıǵa nesıe jelisin ashty, dep habarlady bank baspasóz qyzmetinen.

Mámile «Nurly Jol» Jańa Ekonomıkalyq Saıasatynyń aıasynda óńdeý ónerkásibindegi taýarlardyń qazaqstandyq eksportyn qoldaý maqsatynda jasalyp otyr.

Qaryz qarajaty kompanııanyń ónimdi óndirýge jáne eksporttyq naryqtarda ilgeriletýge, onyń ishinde shıkizat, materıaldar men qaptaýlar satyp alýǵa jasalǵan shyǵyndarymen baılanysty aınalym kapıtalyn tolyqtyrýǵa jumsalmaq.

«2015-2019 jyldar aralyǵynda biz eksporttyq satylymdardy bizdiń jalpy túsimderden 25 paıyzǵa deıin arttyrýdy josparlaımyz. Al memlekettiń «Báıterek» holdıngi jáne damý ınstıtýttary arqyly kórsetken qoldaýdyń arqasynda biz ónim eksportyn arttyrýdy josparlaý múmkindik alyp otyrmyz», - dedi «RG Brands Kazakhstan» JShS Bas dırektory Tımýr Kaltaev.

Kompanııa bul kórsetkishterge negizinen Eýrazııalyq ekonomıkalyq odaq elderinde, eń áýeli, Reseı men Qyrǵyzstanda satylym kólemin ulǵaıtýdyń arqasynda qol jetkizbek.