RFMM oqýshylardyń aýrýhanaǵa túsýine baılanysty túsinik berdi
ALMATY. KAZINFORM — Respýblıkalyq fızıka-matematıka mektebi (RFMM) oqýshylardyń aýrýhanaǵa jatqyzylýyna baılanysty túsinik berdi.
Kazinform agenttigine berilgen resmı jaýapta Almatydaǵy «RFMM» KeAQ fılıaly ýaqytsha qashyqtyqtan oqýǵa jiberilgeni habarlandy. Sebebi 12–13 qazan aralyǵynda mektep oqýshylary arasynda jedel ishek ınfektsııasynyń belgileri tirkelgen.
— 14 qazandaǵy jaǵdaı boıynsha 47 oqýshy Balalar qalalyq juqpaly aýrýlar aýrýhanasyna jatqyzylyp, statsıonarlyq em qabyldap jatyr. Taǵy 6 oqýshy ınternattyń medıtsınalyq oqshaýlaý bólimine ornalastyrylyp, dárigerlerdiń baqylaýyna alyndy. Oryn alǵan jaǵdaıdyń sebepteri qazirgi ýaqytta anyqtalyp jatyr. Aýrýhanaǵa jatqyzylǵan oqýshylarǵa Qazaqstan Respýblıkasy Densaýlyq saqtaý mınıstrliginiń klınıkalyq hattamalaryna sáıkes em taǵaıyndaldy, — dep málimdedi mektep ákimshiligi.
Sonymen qatar mektep ǵımaraty men mektep-ınternatta dezınfektsııalaý jumystary júrgizilgen. Al QR Bas memlekettik sanıtarııalyq dárigerdiń qaýlysyna sáıkes, mektep-ınternattyń jáne as blogynyń jumysy ýaqytsha toqtatylǵan.
— Qaýipsizdikti qamtamasyz etý maqsatynda 14–16 qazan aralyǵynda oqý sabaqtary onlaın formatta ótedi. Internatta qalǵan oqýshylar ata-analaryna nemese jaqyn týystaryna tapsyrylatyn bolady. Jaǵdaı mektep ákimshiligi men tıisti memlekettik organdardyń baqylaýynda, — delingen RFMM jaýabynda.
Eske salaıyq, buǵan deıin RFMM mektebiniń 47 oqýshysy jedel ishek ınfektsııasynyń belgilerimen emhanaǵa jatqyzylǵany belgili boldy.
