RFID tehnologııasy: 20-dan astam mektep kitaphanasynda skanerleýshi robottar jumys istemek

ASTANA. KAZINFORM — Elimizde 700-ge jýyq mektep kitaphanasy jóndeýden ótedi. Bul týraly Oqý-aǵartý mınıstrligi málim etti.

Shaǵyn qalalar men aýdan ortalyqtarynda jáne eldi-mekenderde 1000 mektepti jańǵyrtý jumystary jalǵasyp jatyr. Ol qala men aýyl arasyndaǵy alshaqtyqty azaıtýǵa, balalardyń oqý men tárbıesine jaıly jaǵdaı jasaýǵa, mektepterdiń materıaldyq-tehnıkalyq bazasyn nyǵaıtýǵa baǵyttalǵan jeti negizgi baǵytty qamtıdy.

Osy jumystar aıasynda 2025 jyly 700-ge jýyq mektep kitaphanasy jóndeýden ótedi. Bul shamamen 300 myń balaǵa zamanaýı jáne qolaıly kitaphana keńistigin paıdalanýǵa múmkindik beredi.

– Memleket jyl saıyn bilim berý ınfraqurylymyn jaqsartýǵa qarajat bóledi. Mektep kitaphanalaryn jańǵyrtý aıasynda avtomattandyrylǵan kitaphana júıesi engizilýde, kovorkıng-aımaqtar ashylyp, kúrdeli jóndeý júrgiziledi, jıhazdar jańartylýda, – dedi Infraqurylymdy damytý departamenti dırektorynyń orynbasary Roza Sembaeva.

Mektepterde kitaptardy avtomatty túrde esepke alatyn jáne jedel izdeıtin RFID tehnologııasy engizilýde, al 20-dan astam kitaphanada skanerleýshi robottar jumys jasaıdy. 2023 jyldan bastap «Balalar kitaphanasy» jobasy aıasynda mektep kitaphanalarynyń qory 1,6 mıllıon dana kórkem ádebıetpen tolyqty. Búginde jalpy kitap qory 141 mıllıon danadan asady.

Kadr daıarlaýǵa erekshe kóńil bólinýde: tek 2024 jyly 1 775 mektep kitaphanashysy biliktilikti arttyrý kýrstarynan ótti, al 2025 jyly oqý jalǵasady. Bul — mektep kitaphanalaryn balalar úshin shynaıy bilim men qarym-qatynas ortalyǵyna aınaldyrý jolyndaǵy mańyzdy qadam.

Aıta keteıik, 245 mektep keshendi renovatsııadan ótip jatyr.