RF SІM resmı ókili: Er-Rııadtaǵy AQSh-pen kelissózderden serpilis kútýdiń qajeti joq

ASTANA. KAZINFORM – Reseı Syrtqy ister mınıstrliginiń resmı ókili Marııa Zaharova G.V. Plehanov atyndaǵy Reseı ekonomıka ýnıversıtetiniń stýdentterimen kezdesýde Er-Rııadta ótip jatqan Reseı men AQSh arasyndaǵy konsýltatsııalardan úlken nátıje kútpeýge shaqyrdy, dep habarlaıdy reseılik BAQ.

Zaharovanyń aıtýynsha, Er-Rııadtaǵy kezdesýler birneshe baǵyt boıynsha júrip jatyr jáne kelissózder jabyq esik jaǵdaıynda ótýde.

Buǵan deıin Reseı delegatsııasynyń múshesi, Reseı SІM-niń burynǵy orynbasary, senator Grıgorıı Karasın kelissózderdiń «shyǵarmashylyq sıpatta ótip jatqanyn», sondaı-aq «ózekti máseleler boıynsha qyzyqty pikirtalastar júrip jatqanyn» málimdegen edi.

Onyń sózinshe, Máskeý men Vashıngton «baılanysty saqtap, bir-biriniń ustanymdaryn túsinip jatyr».

Eske sala ketsek, buǵan deıin Er-Rııadta Reseı men AQSh delegatsııalary arasynda konsýltatsııalar bastalǵany týraly habarlanǵan bolatyn.

Sondaı-aq, 23 naýryzda Er-Rııadta AQSh pen Ýkraına delegatsııalarynyń kelissózderi ótken edi.