RF Syrtqy ister mınıstrligi Qazaqstan-Reseı shekarasyndaǵy jaǵdaıǵa túsinik berdi
ASTANA. KAZINFORM — Reseı Syrtqy ister mınıstrliginiń resmı ókili Marııa Zaharova 16 qazanda Qazaqstan-Reseı shekarasynda júk kólikteriniń keptelisi máselesine qatysty pikir bildirdi.
Sońǵy ýaqytta BAQ-ta Reseı men Qazaqstan shekarasynda júk kólikteriniń uzyn-sonar kezegi paıda bolǵany týraly aqparat tarady. Keıbir derekterge sensek, Qytaıdan Qazaqstan men Qyrǵyzstan arqyly ótken 7 myńǵa jýyq júk kóligi, shamamen 77 myń tonna júkpen, Reseı shekarasynda bir aıdan beri tur.
Dál osy máselege qatysty vıtse-premer — Ulttyq ekonomıka mınıstri Serik Jumanǵarın 9 qazan kúni memlekettik organdar, Shekara qyzmeti, Syrtqy ister mınıstrligi, ІІM Kóshi-qon qyzmeti komıteti basshylarynyń, shekara mańy óńirleri ákimderi orynbasarlarynyń jáne Parlament Májilisi depýtatynyń qatysýymen jedel keńes ótkizgen bolatyn.
Onda Reseı Federatsııasyna kirý kezindegi ótkizý pýnktterinde júk kólikteriniń turyp qalýy men Reseı Federatsııasynyń kóshi-qon zańnamasynyń jańa normalarynyń qoldanylýyna baılanysty júrgizýshilerdiń shaǵymy qaraldy.
Al Reseı Syrtqy ister mınıstrliginiń resmı ókili Marııa Zaharova:
— Qazaqstan — bizdiń strategııalyq áriptesimiz jáne Ortalyq Azııadaǵy basty odaqtasymyz. Bizdiń elder arasyndaǵy shekara — álemdegi eń uzyn qurlyqtyq shekara. Sondyqtan ekijaqty yntymaqtastyqtyń mańyzdy baǵyttarynyń biri — qaýipsiz jáne senimdi júk tranzıtin qamtamasyz etetin biryńǵaı eýrazııalyq kólik-logıstıkalyq ınfraqurylym qurý, — dedi.
Onyń aıtýynsha, taraptar transshekaralyq ınfraqurylymdy jaqsartýǵa, onyń ishinde ótkizý pýnktterin jańǵyrtý men jetildirýge erekshe kóńil bóledi.
— Osy jaǵdaıda Reseı Syrtqy ister mınıstrligi eki el shekarasyndaǵy ótkizý júıesiniń jumysyna qatysty kez kelgen qıyndyq týraly aqparatty muqııat qadaǵalap, dıplomatııalyq arnalar arqyly jedel áreket etedi. Bizdegi málimet boıynsha, júk kólikteriniń basym bóligi Qazaqstan aýmaǵyndaǵy halyqaralyq ótkizý beketterine jaqyn turaqtarda tur jáne júk jóneltýshi kompanııalardyń «arnaıy nusqaýlaryn» kútip, shekarany kesip ótpeı otyr. Keıbireýler Reseıdiń Keden qyzmeti mobıldi toptarynyń tekseristerin kúsheıtti dep aıtyp júr. Alaıda bizdiń keden organdarynyń barlyq is-sharalary qatań reglamentke saı júrgizilip, tek Reseı Federatsııasynyń ekonomıkalyq múddelerin, azamattardyń ómiri men densaýlyǵyn, sondaı-aq elge ákelinetin taýarlar tutynýshylarynyń quqyqtaryn qorǵaýǵa baǵyttalǵan. Biz adal syrtqy ekonomıkalyq qatysýshylar úshin ózara saýda aıasynda júk qozǵalysyna eshqandaı kedergi joq ekenin rastaı alamyz, — dedi Zaharova.
Buǵan deıin Qazaqstan men Reseı shekarasyndaǵy ótkizý beketterinde kólikter jınalyp qalǵanyn jazǵan edik.
Artynsha bul máselege qatysty Qazaqstannyń Kólik mınıstrligi de shekarada júk kólikteriniń jınalyp qalýyna qatysty túsinikteme bergen bolatyn. Vedomstvo málimetinshe, kezekter men kidirister Reseı tarapynyń baqylaý sharalaryn qatańdatýymen baılanysty: júktiń tekserý rásimderi kúsheıtilgen, kólikterdi qaraý ýaqyty uzartylǵan, sondaı-aq qujattardy jáne sanıtarlyq, fıtosanıtarlyq talaptardyń saqtalýyn tekserý kúsheıtilgen.
Sonymen qatar Reseıdiń Keden qyzmetiniń resmı aqparatyna saı, ótkizý beketteri qalypty rejımde jumys istep tur, al baqylaý pýnktterinde tyǵyn nemese toqtap qalǵan kólik tirkelmegen.