RF rynogy tómendeýde
ASTANA. Maýsymnyń 29-y. QazAqparat - Búginderi Reseıdiń qor bırjalarynda jetekshi ındeksterdiń tómendep bara jatqandyǵy baıqalady. Eger de saýda 1% kólemindegi shaǵyn túzetýlermen bastalǵan bolsa, qazirgi ýaqytta ındıkatorlar 2%-dan artyq tómendep barady. Al, jekelegen birqatar kógildir fıshkalardyń baǵamynyń qulaýy 4%-dyq kórsetkishten de asyp tústi, dep habarlaıdy RBK.
Reseı rynogyndaǵy ınvestorlar birinshi kezekte munaı baǵasy jónindegi boljamdarǵa kóńil aýdardy. Máskeýdegi "Renessans Kapıtal" konferentsııasynda sóılegen Qarjy mınıstri A.Kýdrın, aldaǵy úsh jyl kóleminde munaıdyń bir barreli 60 dollarǵa deıin arzandaıdy degen boljam aıtty. Munaı baǵasy osy deńgeıde kem degende jarty jyldaı turady, dep atap ótken qarjy mınıstri «bizdiń ekonomıkamyzdyń táýekeldiliginiń eskerilýi» qajet ekendigin aıtty. Árıne, osynshalyqty túńilip aıtylǵan boljamǵa reseı rynogynyń aktsııasy kóńil bólmeı qalǵan joq. Qazir barlyq derlik munaı óndiretin kompanııalardyń baǵamy mınýsta qalyp otyr, olar: «Reseımunaıdyń» qaǵazy 3,12%, «Gazprom munaı» 3,53%, al «Tatmunaı» baǵamy 2,23%-ǵa kemidi.
