RF Prezıdentiniń Kýbogyn uıymdastyrýshylar Qazaqstan atletshilerine alǵys bildirdi
ASTANA. QazAqparat - Groznyı qalasynda keshe túnde aıaqtalǵan Aýyr atletıka boıynsha Reseı Federatsııasy Prezıdentiniń Kýbogy úshin besinshi halyqaralyq týrnırde Qazaqstan komandalyq esepte ekinshi oryndy ıelendi.
Birinshi oryndy reseılik atletshiler alsa, úshinshi oryndy AQSh komandasy qanaǵat tutty.
Týrnırdiń jabylý rásiminde sóz sóılegen Sheshen Respýblıkasynyń aýyr atletıka federatsııasynyń prezıdenti Magomed Qadyrov sporttyń osy bir túrinen jarystyń joǵary deńgeıde ótkenin aıta kelip, barlyq qatysýshylarǵa rızashylyǵyn bildirdi. Óz sózinde osy týrnırde jańa rekord ornatqan Qazaqstan tarapyna alǵysyn aıtty.
Aıta ketý kerek, bul halyqaralyq týrnırdiń alǵashqy kúni Qazaq eliniń namysyn qorǵaǵan Ilıa Ilın ǵana serpe kóterýde jáne qos saıys nátıjesinde álem rekordyn ornatqan edi.
Al keshe 105 keliden joǵary salmaqtaǵy ziltemirshiler óz kúshterin synǵa saldy. Reseı sportshysy, eki dúrkin álem chempıony Rýslan Albegov jeńimpaz boldy. Ol serpe kóterýdiń birinshi jattyǵýynda 235 kelini kóterip, altyn júldeni ıelendi. Odan keıin óziniń otandasy Alekseı Lovchevtiń AQSh-tyń Hıýston qalasynda ótken Aýyr atletıkadan álem chempıonatynda ornatqan (264 keli) rekordyn jańartýǵa bel baılady. Sóıtip, Rýslan Albegov ekinshi múmkindiginde 265 kelige tapsyrys berdi. Eki ret talpynyp kórip edi, alaıda, bul salmaq oǵan ázirge baǵynbady.
Aıta ketý kerek, jarystyń sońǵy kúni áıelder arasynda 75 keliden joǵary salmaq boıynsha qazaqstandyq Aleksandra Aborneva el namysyn qorǵap, kúmis júldeni ıelendi.
105 keliden joǵary salmaqtaǵy erlerdiń básekesine qatysqan qazaqstandyq úsh sportshy Dmıtrıı Kaplın, Ibragım Bersanov jáne Selımhan Abýbakarov júlde almaǵanmen, halyqaralyq týrnırde laıyqty óner kórsetkenin aıta ketken jón.
