RF Prezıdenti Vladımır Pýtın Konstıtýtsııaǵa ózgeris engizýdi usyndy
MÁSKEÝ. QazAqparat – RF Federaldy jınalysyna joldaý jasaǵan Reseı Prezıdenti Vladımır Pýtın el Konstıtýtsııasyna usynylǵan ózgerister paketi boıynsha memleket azamattarynyń daýys berýin ótkizý bastamasyn kóterdi, dep habarlaıdy QazAqparat.
«Eldiń Negizgi zańyna keıbir ózgeristerdi engizý ýaqyty jetti, olar bizdiń quqyqtyq keńistikte Reseı Konstıtýtsııasynyń basymdyǵyna tikeleı kepildik beredi», - dep toqtaldy V. Pýtın.
Bul turǵyda tıisti túzetýler Reseıde halyqaralyq zańnama men sharttar talaptary el Konstıtýtsııasyna qaıshy bolmaǵan bóliginde ǵana kúshinde bolatynyn qarastyrady.
Sonymen qatar ol úkimet quramyn qalyptastyrý máselesinde parlament ókilettigin keńeıtý bastamasyn kóterdi.
Pýtın Memlekettik Dýmaǵa tek kelisý ǵana emes, sonymen qatar RF Úkimeti tóraǵasy men onyń orynbasarlaryn, federaldy mınıstrlerdi bekitýdi senip tapsyrýdy usyndy. «Bul rette prezıdent olardy laýazymǵa taǵaıyndaýǵa mindetti bolady», - dedi RF basshysy.
Onyń paıymynsha, Reseı qýatty prezıdenttik respýblıka bolyp qalýy kerek. Sonymen birge, prezıdentte qarýly kúshterge jáne quqyq qorǵaý organdaryna tikeleı basshylyǵy ókilettigi qalýy tıis.
V. Pýtın RF prezıdentine kandıdattarǵa talaptardy kóterýdi usyndy. Bul turǵyda Reseı aýmaǵynda 25 jyldan kem emes merzimde turaqty ómir súrýi, sondaı-aq shetel azamattyǵynyń bolmaýy talabyn bekitý kerektigi aıtyldy.
Budan bólek, birqatar bastamalar sot organdarynyń róline, gýbernatorlar róli men mártebesine qatysty boldy.
«Reseı Federatsııasy Konstıtýtsııasyna usynylǵan túzetýlerdiń barlyq paketi boıynsha el azamattarynyń daýys berýin ótkizý qajet dep sanaımyn. Tek osynyń nátıjesi boıynsha sońǵy sheshimdi qabyldaıtyn bolamyz», - dedi ol.
FOTO: © Mıhaıl Mettsel/TASS