RF Prezıdenti Vladımır Pýtın Dmıtrıı Medvedevke jańa qyzmet usyndy
MÁSKEÝ. QazAqparat – Reseı Prezıdenti Vladımır Pýtın RF Qaýipsizdik keńesi tóraǵasynyń orynbasary jańa laýazymyn engizip, oǵan Mınıstrler kabınetiniń burynǵy basshysy Dmıtrıı Medvedevti taǵaıyndaýdy usyndy, dep habarlaıdy «QazAqparat» HAA menshikti tilshisi.
V.Pýtın Mınıstrler kabınetine qol jetkizilgen jetistikter úshin alǵys aıtty. «Úkimettiń jańa quramy qurylǵanǵa deıin óz mindetterińizdi tolyq kólemde atqarýdy suraımyn», - dedi ol RF Úkimetiniń eks-tóraǵasymen kezdesý barysynda.
El Prezıdenti sondaı-aq, D.Medvedevtiń Premer-mınıstr laýazymynda úlken tájirıbesi baryn jáne ol ár ýaqytta qaýipsizdik pen qorǵanys máselelerimen aınalysqanyn atap ótti.
«Bul múmkin dep sanaımyn jáne odan naqty osy sanattaǵy máselelerdi qolǵa alýdy ótindim. Bul múmkin dep oılaımyn jáne aldaǵy jaqyn ýaqytta muny iske asyramyn – RF Qaýipsizdik keńesi tóraǵasynyń orynbasary laýazymy engiziletin bolady. Qaýipsizdik keńesiniń tóraǵasy Prezıdent bolyp tabylatyny belgili. Eger qoldanystaǵy zańǵa ózgerister engizý qajet bolsa, muny jasaýǵa daıynmyn. Taıaý kúnderi depýtattardy da qoldaý bildirýge shaqyratyn bolamyn», - dedi RF basshysy.
Eske salaıyq, búgin V.Pýtın RF Federaldy jınalysynyń aldynda joldaýyn jarııalap, onda aldaǵy kezeńdegi jumystardyń basymdyqtaryn aıqyndady. Sondaı-aq el Konstıtýtsııasyna ózgerister engizýdi usyndy. Keıin el Úkimeti tolyq quramda otstavkaǵa ketetini málim boldy.
