RF Nevel qalasynda qazaqstandyq UOS ardageri Y. Súleımenov atyndaǵy kóshede memorıaldyq taqta ashyldy

ASTANA. QazAqparat - Reseıdiń Pskov oblysy Nevel qalasynda ERG (Eurasian Resources Group) enshiles kompanııasy - ENRC-diń «Batyrlar jolymen» atty halyqaralyq patrıottyq jobasy aıasynda Uly Otan soǵysynda mergendigimen kózge túsken Ybyraıym Súleımenov atyndaǵy kóshede memorıaldy taqtanyń ashylý rásimine baılanysty saltanatty sharalar ótkizildi.

Búgingi tańda erjúrek qazaq batyrynyń esimi men onyń erligi Nevel qalasynyń árbir turǵynyna tanymal. Ybyraıym Súleımenov 1941 jyly Qyzyl ásker qataryna shaqyrylǵan edi. Ol júzinshi qazaq atqyshtar brıgadasynyń quramynda Máskeý mańyndaǵy urystarǵa, Velıkıı Lýg pen Neveldi jaýdan bosatý operatsııalaryna qatysty.

Starshına Y. Súleımenov 289 fashıstiń kózin joıdy. Mergen 1943 jyldyń 15 qazanynda Izocha stansasynyń mańynda qaza tapty. Dál osy urysta 100-shi atqyshtar brıgadasy taǵy bir talantty batyr qyzdan - pýlemetshi Mánshúk Mámetovadan aıyrylǵan edi.

Mánshúk Mámetovaǵa Keńes Odaǵynyń Batyry ataǵy berildi, Ybyraıym Súleımenov Lenın ordenimen marapattaldy. Sol jyly Neveldiń eki kóshesi jerlesterimizdiń esimimen atalatyn boldy.

Memorıaldy taqtanyń saltanatty ashylý rásimine qala turǵyndary, mektep oqýshylary men Qazaqstannan kelgen delegatsııa qatysty. Kishigirim mıtıngiden soń jınalǵan qaýym Keńes Odaǵynyń Batyry Mánshúk Mámetovanyń eskertkishine gúl shoǵyrlaryn qoıyp, áskerı dańq murajaıy men jergilikti mektep-gımnazııasyna baryp qaıtty.

Ybyraıym Súleımenov esimin qaıta jańǵyrtý usynysyn «Maıdan joly» izdestirý otrıadynyń músheleri jasaǵan edi. Bul ıgi isti «Qazaqstan elektrolız zaýyty» AQ (QEZ) prezıdenti Almaz Ibragımov pen Eýrazııalyq Toptyń jetekshileri tolyǵymen qoldap, patrıottyq jobany qarjylandyrýdy óz qolyna alǵan bolatyn.

- Ybyraıym Súleımenov jaıly gazet betterinde jazylyp, kezinde uly aqyn Jambyl Jabaev oǵan óleń joldaryn arnaǵan bolatyn. Ol joıǵan jaýdyń sany boıynsha álemniń júz tańdaýly mergeniniń qataryna engen. Búgingi tańda osyndaı qurmetti tulǵany esimizge alý - bizdiń boryshymyz, - dedi mıtıng barysynda QEZ vıtse-prezıdenti Jumabek Kamzın.

Sondaı-aq, «Batyrlar jolymen» patrıottyq jobasy aıasynda Neveldegi Ábilqaıyr Baımoldın alańynda polkovnıktiń qola músini ornatyldy. Onyń saltanatty ashylý rásimi erteń, 7 mamyr kúni bolmaq. Bul jerde QEZ bazasynda qurylǵan «Maıdan joly» otrıadynyń izdeýshileri alańda jóndeý-qalpyna keltirý jumystaryn jasap, 600-den astam keńes sarbazy jerlengen qalanyń ortalyq áskerı zıratyn jónge keltirdi. Barlyq jumystar Neveldiń ákimshiligi men turǵyndarymen birlese atqaryldy, dep habarlady «Qazaqstan elektrolız zaýyty» AQ baspasóz qyzmeti.