RF memqyzmetkerleri Qazaqstanǵa oqýǵa keldi

ASTANA. QazAqparat - Búgin QR Prezıdentiniń janyndaǵy Memlekettik qyzmet akademııasynda «Memlekettik basqarý: Qazaqstan tájirıbesi» taqyrybynda Reseı Federatsııasynyń basqarýshylyq kadrlar rezerviniń bastapqy jáne perspektıvaly deńgeıi úshin taǵylymdamadan ótý baǵdarlamasy bastaldy, dep habarlaıdy QazAqparat.

Atap aıtqanda, taǵylymdamadan ótý baǵdarlamasyna Máskeý, Sankt-Peterbor, Hakasııa Respýblıkasynyń, Qalmyq Respýblıkasynyń, Saha Respýblıkasynyń jáne Novosibir, Qorǵan, Kalınıngrad oblystary men Reseı Federatsııasynyń basqa da óńirlerinen 30 memlekettik qyzmetshi qatysýda.

Baǵdarlama maqsaty - Reseı Federatsııasynyń memlekettik qyzmetshilerin memlekettik basqarý jáne memlekettik qyzmet salasyndaǵy Qazaqstan Respýblıkasynyń tájirıbesimen tanystyrý. Osy tusta taǵy bir aıta keterlik jaıt, taǵylymdamadan ótý baǵdarlamasy Reseı tarapynyń suranysyna baılanysty uıymdastyrylýda. Baǵdarlama barysynda Qazaqstan Respýblıkasynyń  ekonomıkalyq saıasatty qalyptastyrý jáne iske asyrý isimen, sonymen qatar,  membasqarý tájirıbesi jáne turaqty damý saıasaty barysymen tanysý qarastyrylatyn bolady.

Taǵylymdamadan ótý is-sharalary barysynda Reseı tarapy, Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń, QR Bilim jáne ǵylym mınıstrliginiń, QR Investıtsııalar jáne damý mınıstrliginiń, Qazaqstandyq memlekettik-jeke menshik áriptestik ortalyǵynyń, «Halyqaralyq baǵdarlamalar ortalyǵy» AQ, Memlekettik korporatsııanyń, «Úkimet-azamattar úshin», «Ekonomıkalyq zertteýler ınstıtýty», sondaı-aq basqa uıymdardyń ókilderimen kezdesedi. Munymen qosa, Halyqqa qyzmet kórsetý ortalyqtarynda oqytý sharalary josparlanýda.