RF Qorǵanys mınıstrligi DAISh kóshbasshysynyń kózi joıylǵandyǵyn habarlady
MÁSKEÝ. QazAqparat - QR Qorǵanys mınıstrligi Sırııadaǵy reseılik avıasoqqy saldarynan, aldyn ala derek boıynsha, DAISh jetekshisi Abý-Bakr-ál-Bagdadıdiń kózi joıylǵandyǵyn habarlady.
Habarlanǵandaı, mamyr aıynyń sońynda Sırııa Arab Respýblıkasyndaǵy Reseı áskeri tobynyń komandovanıesi Rakka qalasynyń ońtústiginde DAISh lańkestik toby kóshbasshylarynyń májilisi ótetindigi týraly aqparat alǵan.
«2017 jylǵy 28 mamyrda pılotsyz quralmen DAISh basshylarynyń kezdesetin orny men ýaqyty týraly derekter rastalǵannan keıin, reseılik avıatsııa 00.35-ten 00.45-ke deıin soqqy jasady», - delingen habarlamada.
Sý-35 jáne Sý-34 ushaqtarynyń soqqysy saldarynan IGIL áskerı keńesiniń quramyna kiretin lańkestik toptardyń joǵary laýazymdy komandırleriniń, orta býynnyń 30 dalalyq komandıriniń, jeke kúzettiń 300-ge jýyq sodyrynyń kózi joıyldy.
Kózi joıylǵan lańkester arasynda - aýdandy Rakkıden Es-Sýhnaǵa deıin baqylaǵan emır Abý ál-Hadjı ál-Mysrı, emır Ibragım An-Naef ál-Hadj, IGIL qaýipsizdik qyzmetiniń bastyǵy Sýleıman Ál-Shaýah bar.
Túrli arnalar boıynsha tekseriletin aqparatqa sáıkes, jınalysqa sondaı-aq DAISh kóshbasshysy Ibragım Abý-Bakr ál-Bagdadı qatysqan, ol soqqy nátıjesinde qaza tapty.
Reseı avıatsııasynyń júrgizetin is-qımyly men onyń orny týraly ózara áreket etý arnalary boıynsha amerıkalyq tarap aldyn ala habardar etildi.
