RF bankteri ıpotekalyq nesıe boıynsha mólsherlemeni jappaı kótere bastady
ASTANA. QazAqparat - Reseıde sońǵy eki aıda ıpotekamen jumys isteıtin bankterdiń kóbi paıyzdyq mólsherlemelerin arttyrdy. 2015 jyly da baspana nesıesi qymbattaıdy, dep habarlady RBK.
Bankter ıpotekalyq nesıe boıynsha mólsherlemeni qyrkúıek-qazan aılarynda kótere bastaǵan. Qazan aıynyń ortasynda naryq lıderleriniń biri - VTB24 - baspana nesıesin 0,5 paıyzǵa kótergen. Jyljymaıtyn múlikti satyp alýǵa beriletin nesıe boıynsha maksımaldy mólsherleme jyldyq 14,45%-ǵa deıin kóterildi. Qarasha aıynda ıpoteka ortasha alǵanda 0,5-1 paıyz qymbattady. Qarasha-jeltoqsan aılarynda ıpoteka boıynsha mólsherlemeni Gazprombank (0,5-1), Alfa-bank (0,7), «Otkrytıe» banki (1-1,25), Promsvıazbank (0,25-0,9), SMP Bank (2-3,5 p.p), «DeltaKredıt» banki (0,25-1 p.p.) ósirdi. Sondaı-aq, ıpoteka Raıffaızenbankte, Hanty-Mansıısk bankinde, RSHB, MTS Bankinde qymbattady.
«Turǵyn úı nesıeleri boıynsha mólsherlemeniń ósýi sebepteriniń biri Ortalyq banktiń negizgi mólsherlemesiniń 9,5% deıin ósýi», - dedi Absolıýt Banki basqarma tóraǵasynyń orynbasary Tatıana Ýshkova. Loko Banktiń ıpotekalyq bıznesiniń dırektory Irına Dzıýbanyń sózine qaraǵanda, batys kapıtaly naryǵynyń jabylýy, teris ekonomıkalyq faktorlar bankterge áser etken. Sondyqtan olar nesıe qunyn ósirýge májbúr.
Ipoteka aldaǵy ýaqytta da qymbattaýy múmkin deıdi mamandar. «Qazir baspanany satyp alýǵa beriletin nesıe mólsherlemesi rýblmen eseptegende shamamen jyldyq 14%-ǵa qymbattady. Mólsherlemeni kótermegen bankter aldaǵy ýaqytta baǵany qymbattatady dep oılaımyn», - dedi «Interkommerts» bankiniń súıemeldeý jáne ıpotekalyq nesıelerdi qarjylandyrý basqarmasynyń basshysy Natalıa Kýlagına.
